वाडा, ता. ४ (बातमीदार) : ग्रामीण भागात अकरावी प्रवेश प्रक्रियेत बदल करत पूर्वीच्या ऑफलाइन प्रणालीऐवजी ऑनलाइन केली आहे. दुर्गम भागातील महाविद्यालयात प्रवेश घेताना या विद्यार्थ्यांची मोठ्या प्रमाणावर फरफट होत असल्याची पालकांची ओरड आहे. जवळ असलेल्या शाळेपेक्षा लांबच्या शाळेत जाताना खर्चाचा भार परवडत नाही.

चिंचघर येथील घ. बा. पाटील कनिष्ठ महाविद्यालयातील दहावी उत्तीर्ण झालेल्या २१९ विद्यार्थ्यांपैकी कला शाखेत ३२ मुलांना, तर विज्ञान शाखेत २८ मुलांना तिस-या फेरीअखेर प्रवेश मिळाला. अजून १५९ मुले अकरावी प्रवेशाबाबत संभ्रमात आहेत. खुल्या गटातील विद्यार्थ्यांना ७३ टक्के, ओबीसी आरक्षण ७१टक्के, एस.टी.साठी ६२ टक्के, तर एस.सी.साठी ४६ टक्के आरक्षणावर प्रवेश बंद झाल्याने ऑनलाइन प्रक्रियेत कमी गुण मिळालेले विद्यार्थी वंचित आहेत. पूर्वीप्रमाणेच आरक्षण ठेवून ऑफलाइन प्रवेश प्रक्रिया राबविण्यात यावी, अशी मागणी आदिवासी समाजातील मुले वंचित राहू नयेत, म्हणून खासदार डाॅ. हेमंत सवरा यांनी शिक्षण मंत्र्याकडे केली आहे.

चिंचघर येथील कनिष्ठ महाविद्यालयाप्रमाणे वाडा तालुक्यातील सर्व महाविद्यालयातील विद्यार्थी प्रवेशापासून वंचित आहेत.वाडा तालुक्यातील कनिष्ठ महाविद्यालयात शिक्षण घेणारी मुले ही बहुसंख्य शेतमजूर व शेतकऱ्यांची सामान्य कुटुंबातील आहेत. ग्रामीण भागातील पालक गरीब व मोलमजुरी करणारे असल्याने बाहेरगावी खर्च करून प्रवास करू शकत नाहीत. म्हणून सरकारने ऑफलाइन प्रक्रिया राबवावी, असे सामाजिक कार्यकर्ते श्रीकांत भोईर यांनी सांगितले.

शिक्षणापासून वंचित राहण्याची शक्यता
विद्यालयाच्या चार किमी अंतरावर हे विद्यार्थी पायी शाळेत येतात. खर्चासाठी त्यांच्याकडे फारसे पैसे नसतात, ऑनलाइन प्रक्रियेत त्यांचा क्रमांक वाडा, भिवंडी यासारख्या महाविद्यालयात लागले, तर त्यांना दिवसागणिक दोनशे रुपये प्रवासासाठी खर्च करावे लागतील. मजुरी करणारे पालक एवढा खर्च करू शकत नाहीत, म्हणून मुले शिक्षणापासून वंचित राहण्याची शक्यता अधिक आहे.