रोहा, ता. ४ (बातमीदार)ः घरची परिस्थिती बिकट असताना शासकीय जमिनींचा आधार घेत राहण्यासाठी निवारा उभा केला. सर्वस्व पणाला लावून बांधलेला निवारा कायमस्वरूपी व्हावा, अशी स्वप्न उराशी बाळगली. सरकार दरबारी खेटा मारल्या. त्यानंतर ४० वर्षांच्या प्रदीर्घ प्रतीक्षेनंतर रोह्यातील कालवा रोड परिसरातील १७ कुटुंबीयांना हक्काची घरे मिळाली.
राज्याचे उपमुख्यमंत्री अजित पवार यांच्या हस्ते गरीब कुटुंबीयांना सनद देण्यात आल्या. कारवाईची टांगती तलवार असलेली घरे आता मात्र मालकीची झाली. त्यामुळे सनद हाती मिळताच सदस्यांच्या डोळ्यांतून अश्रूंनी वाट मोकळी केली. ४० वर्षांपासून या ठिकाणी वास्तव्य आहे. दागिने, पैसे काहींनी सर्वस्व पणाला लावून हक्काचा निवारा उभा केला आहे, पण बांधलेली घरे अधिकृत नसल्याने कधी प्रशासन कारवाई करेल, याची भीती नेहमी सतावत होती, पण माजी उपनगराध्यक्ष समीर सकपाळ, शिल्पा धोत्रे यांनी शासन दरबारी मेहनत घेतली होती.
------------------------------------
नगरपालिकेचा पुढाकार
रोहे शहरातील हनुमान नगर आणि धाकसूद देवस्थान परिसरातील २१ लोकांना हक्काची घरे देण्यात आली. विशेष म्हणजे, अतिक्रमणाला कायद्याच्या चौकटीत बसवून रीतसर मालकी हक्क मिळवून देणारी रोहा-अष्टमी नगरपालिका ही महाराष्ट्रात पहिली नगरपालिका ठरली आहे.