बदलापूर घटनेची ठाण्यात पुनरावृत्ती?
मनविसेने केली भीती व्यक्तः पोलिस उपायुक्तांकडे कारवाईची मागणी
सकाळ वृत्तसेवा
ठाणे, ता. ५ ः पोक्सो गुन्हयाचा तपास जलदगतीने करून संबंधित शाळा व्यवस्थापनावर कायदेशीर कारवाई करावी, अशी मागणी मनविसेने केली आहे. दरम्यान, मनविसेने बदलापूर येथील घटनेची ठाण्यात पुनरावृत्ती होऊ नये, अशी भीती व्यक्त करीत यासंदर्भात कठोर उपाययोजना कराव्यात, असेही ठाणे शहर पोलिस दलातील वागळे परिमंडळ पाचच्या पोलिस उपायुक्त प्रशांत कदम यांना निवेदनाद्वारे मनविसेने सरचिटणीस संदीप पाचंगे यांनी म्हटले आहे.
ठाण्यातील पोखरण रोड येथील सुनितीदेवी सिंघानिया स्कूल या शाळेतील तीन वर्षाच्या मुलीवर ३० जुलै रोजी अतिप्रसंगाचा प्रकार घडला. याप्रकरणी वर्तकनगर पोलिस ठाण्यात गुन्हा दाखल झाला आहे. तर ही मुलगी शाळेत असताना हा प्रकार घडला असल्याने आरोपीला तात्काळ अटक होणे गरजेचे आहे, असे नमूद करताना या प्रकरणात गांभीर्याने तपास करण्याचे आदेश द्यावेत. शाळेतील शिक्षक, कर्मचारी, सर्वांची चारित्र पडताळणी झालीय का? नसल्यास निष्काळजीपणा करणाऱ्या शाळा प्रशासनावर देखील गुन्हा दाखल करण्यात यावा, अशी मागणी महाराष्ट्र नवनिर्माण विद्यार्थी सेनेचे सरचिटणीस पाचंगे यांनी केली.