नरेंद्र पवार यांचे उपोषण तूर्तास स्थगित
कल्याण, ता. ६ (वार्ताहर) : कोकण वसाहतीतील शांतीदूत सोसायटीच्या रखडलेल्या पुनर्विकास प्रकल्पासंदर्भात भाजपचे माजी आमदार नरेंद्र पवार यांनी रहिवाशांसह सुरू केलेले बेमुदत उपोषण मंगळवारी (ता. ५) तिसऱ्या दिवशी तूर्तास स्थगित करण्यात आले. मुख्यमंत्री देवेंद्र फडणवीस यांनी लवकरच बैठक घेऊन प्रश्न सोडवण्याचे आश्वासन दिल्याने हे उपोषण मागे घेण्यात आले आहे. यासंदर्भात भाजप आमदार किसन कथोरे आणि महेश चौगुले यांनी मुख्यमंत्री फडणवीस यांच्याशी चर्चा करून त्यांना सविस्तर माहिती दिली. त्यानंतर मुख्यमंत्र्यांनी लवकरात लवकर बैठक घेण्याचे आश्वासन दिले. ही माहिती पवार यांना देण्यात आली असून भाजपचे प्रदेशाध्यक्ष रवींद्र चव्हाण यांनाही याची कल्पना देण्यात आली आहे. मुख्यमंत्री आणि प्रदेशाध्यक्षांच्या बैठकीत आम्हाला समाधान न मिळाल्यास पुन्हा उपोषण सुरू करू; मात्र मुख्यमंत्री प्रश्न सोडवतील, यावर आमचा विश्वास आहे, असे नरेंद्र पवार यांनी स्पष्ट केले.