युवकांच्या कल्पकता, जिद्दीला दिशा
५८व्या युवक महोत्सवाची प्राथमिक फेरी जीवनदीप महाविद्यालयात जल्लोषात
कल्याण, ता. ६ (वार्ताहर) : विद्यार्थ्यांच्या व्यक्तिमत्त्व विकासासाठी आणि त्यांच्या कलागुणांना व्यासपीठ उपलब्ध करून देण्यासाठी मुंबई विद्यापीठाचा ५८वा युवक महोत्सव आयोजित करण्यात आला आहे. ठाणे, पालघर ग्रामीण झोन क्रमांक सहाची प्राथमिक फेरी गोवेली येथील जीवनदीप महाविद्यालयात मोठ्या उत्साहात पार पडली. युवक महोत्सव म्हणजे केवळ स्पर्धा नव्हे, तर विद्यार्थ्यांच्या सर्जनशीलतेचा उत्सव होता. विविध कला, विचार, अभिव्यक्ती आणि सांघिकतेच्या माध्यमातून विद्यार्थ्यांनी आपल्या क्षमता सप्रमाण सादर केल्या. युवकांतील ऊर्जा, कल्पकता आणि जिद्द यांना योग्य दिशा देणारा हा महोत्सव आयुष्यातील एक अविस्मरणीय अनुभव ठरला. हा युवक महोत्सव सांस्कृतिक रंगांनी नटलेला होता.

विद्यार्थ्यांच्या कलात्मक व बौद्धिक क्षमतांना वाव मिळावा, स्पर्धात्मकतेतून आत्मविश्वास वाढावा आणि त्यातून एक सशक्त युवा नेतृत्व घडावे, या उद्देशाने विद्यार्थी विकास विभाग, मुंबई विद्यापीठ आणि जीवनदीप महाविद्यालय गोवेली यांच्या संयुक्त विद्यमाने या महोत्सवाचे आयोजन करण्यात आले होते. कार्यक्रमाच्या उद्घाटनप्रसंगी मान्यवर म्हणून प्रसिद्ध कलाकार संदीप रेडकर, नीलेश सावे, शीतल रेडकर, तसेच झोन समन्वयक डॉ. जयश्री कवठेकर आणि डॉ. प्रकाश धुमाळ उपस्थित होते. प्राचार्य डॉ. अशोक वाघ यांनी प्रास्ताविक करून महोत्सवाचे उद्दिष्ट स्पष्ट केले. संदीप रेडकर आणि नीलेश सावे यांनी विद्यार्थ्यांना कला, सर्जनशीलता आणि सामाजिक भान याबाबत प्रेरणादायी मार्गदर्शन केले.

युवक महोत्सवात विद्यार्थ्यांसाठी रांगोळी, वक्तृत्व, एकपात्री अभिनय, पथनाट्य, मेहंदी, पारंपरिक नृत्य, संगीत, वादविवाद, ऑन स्पॉट पेंटिंग, क्ले आर्ट अशा विविध स्पर्धांचे आयोजन करण्यात आले होते. या रंगतदार स्पर्धांमध्ये १८ हून अधिक महाविद्यालयांनी सहभाग नोंदवला आणि स्पर्धात्मक वातावरणात विद्यार्थ्यांनी आपली कला सादर करीत उपस्थितांची मने जिंकली. स्पर्धा संपल्यानंतर सहभागी महाविद्यालयांचे समन्वय प्राध्यापक व विद्यार्थ्यांनी जीवनदीप महाविद्यालयाच्या आदरातिथ्याचे विशेष कौतुक केले. विजेत्या महाविद्यालयांना संस्थेचे अध्यक्ष रवींद्र घोडविंदे यांच्या हस्ते प्रमाणपत्र आणि गुलाबपुष्प देऊन सन्मानित करण्यात आले.

महोत्सवाच्या यशस्वीतेसाठी प्रयत्न
कार्यक्रमाचे सूत्रसंचालन आणि आभार प्रदर्शन सांस्कृतिक विभागप्रमुख प्रा. सतीश लकडे यांनी केले. महोत्सवाच्या यशस्वी आयोजनासाठी संचालक प्रशांत घोडविंदे, उपप्राचार्य हरेंद्र सोष्टे, तसेच प्रा. मोहन गारे, प्रा. मयूरी कांबळे, प्रा. ललिता पवार यांचा मोलाचा सहभाग होता. महाविद्यालयातील सर्व प्राध्यापक वर्ग, शिक्षकेतर कर्मचारी, राष्ट्रीय सेवा योजनेचे स्वयंसेवक विद्यार्थी यांच्या समन्वयामुळे हा महोत्सव अत्यंत सुसूत्र आणि उत्साही वातावरणात पार पडला.