राज्यात १२० वसतिगृहे उभारणार!
२५ हजार विद्यार्थ्यांना निवास सुविधा

मुंबई, ता. ६ : सामाजिक न्याय विभागामार्फत विद्यार्थ्यांसाठी उच्च दर्जाची वसतिगृहे उभारण्याचा महत्त्वाकांक्षी उपक्रम हाती घेण्यात आला आहे. राज्यभरात एकूण १२० ठिकाणी वसतिगृहे उभारली जाणार असून, त्यातून २५ हजार विद्यार्थ्यांना निवासी सुविधा उपलब्ध होणार आहेत. वसतिगृहासाठी शासनाने १,२०० कोटी रुपयांची तरतूद केली असल्याची माहिती सामाजिक न्याय मंत्री संजय शिरसाट यांनी दिली.
सामाजिक न्याय व विशेष सहाय्य विभागांतर्गत भारतरत्न डॉ. बाबासाहेब आंबेडकर मुलांचे शासकीय वसतिगृह युनिट १, २, ३ आणि संत एकनाथ मागासवर्गीय मुलांचे वसतिगृह याच्या नूतन इमारतींचे त्यांच्या हस्ते आज उद्घाटन झाले. त्या वेळी ते बोलत होते. या वेळी सांस्कृतिक कार्यमंत्री तथा मुंबई उपनगरचे पालकमंत्री ॲड. आशीष शेलार, सामाजिक न्याय राज्यमंत्री माधुरी मिसाळ, समाजकल्याण आयुक्त बाबासाहेब बेलदार, प्रादेशिक उपायुक्त समाजकल्याण मुंबई विभाग वंदना कोचुरे उपस्थित होते. शिरसाट म्हणाले, की ज्या ठिकाणी माझा जन्म झाला तिथे वसतिगृहाचे उद्‍घाटन करण्याचा योग मला आला आहे. हा माझ्यासाठी आनंदाचा क्षण आहे. हे उभारण्यात आलेले वसतिगृह ही फक्त वास्तू नव्हे, तर विद्यार्थ्यांच्या उज्ज्वल भविष्यासाठीचा एक संकल्प असल्याचे त्यांनी सांगितले.
...
विद्यार्थ्यांनी या संधीचे सोने करावे!
मंत्री ॲड. शेलार म्हणाले, की या वसतिगृहातून बाहेर पडणारे विद्यार्थी भविष्यात समाजात मानाचे स्थान मिळवतील, हीच अपेक्षा आहे. वसतिगृहातून शिकून विद्यार्थी आयएएस, आयपीएस, न्यायाधीश, डॉक्टर, इंजिनिअर झाले आणि काही वर्षांनी याच प्रांगणात त्यांचा कौतुक सोहळा झाला, तर तो क्षण मला पाहायला नक्कीच आवडेल. राज्यमंत्री माधुरी मिसाळ म्हणाल्या, की मुंबईसारख्या वर्दळीच्या शहरात शासकीय वसतिगृहात प्रवेश मिळणे ही एक मोठी संधी आहे. विद्यार्थ्यांनी या संधीचे सोने करावे. आई-वडिलांचे स्वप्न साकार करण्यासाठी विद्यार्थ्यांनी मेहनत घ्यावी, असे आवाहनही त्यांनी केले.