४४ कोटींच्या करचोरीप्रकरणी आरोपींना जामीन

जुईनगर, ता. ६ (बातमीदार) : मुंबई कृषी उत्पन्न बाजार समितीमधील व्यापाऱ्याने आयात शुल्क बुडवल्याने महसूल गुप्तचर संचालनालयाने जूनमध्ये कारवाई केली होती. देशातील सर्वात मोठा ड्रायफ्रूट (सुकामेवा) ‘कर’चोरी घोटाळा असल्याचे बोलले जात होते. याप्रकरणी मुंबईतील प्रसिद्ध अक्रोड व्यापारी दीपक काकडिया आणि त्याचा मुलगा स्नेह काकडिया यांना सोमवारी (ता. ४) मुंबई उच्च न्यायालयाकडून अटकपूर्व जामीन मिळाला; मात्र आरोपींना पाच कोटी रुपये महसूल गुप्तचर संचालनालयाकडे (डीआरआय) जमा करणे बंधनकारक असून, तपासात पूर्ण सहकार्य करण्याचे न्यायालयाने स्पष्ट केले.

आरोपींनी चिलीमधून आयात केलेल्या अक्रोडची किंमत कमी करून दुबई शेल कंपन्यांद्वारे बनावट पावत्या तयार करीत सरकारची मोठ्या प्रमाणावर फसवणूक केल्याचा आरोप ठेवण्यात आला आहे. दुबईस्थित युरो सेव्हन जनरल ट्रेडिंग ‘एलएलसी’च्या माध्यमातून खऱ्या पावत्या लपविल्या गेल्या आणि खोटी कागदपत्रे भारतीय सीमा शुल्क विभागात सादर करण्यात आली होती. डीआरआयच्या तपासात असे दिसून आले, की संपूर्ण ड्रायफ्रूट व्यवसायाच्या नावाखाली हवाला आणि मनी लाँड्रिंगसारखा गंभीर गुन्हा झाला आहे. या प्रकरणात मेसर्स दीपक ट्रेडिंग कंपनी, मेसर्स एंजेल एंटरप्रायझेस, मेसर्स दीपक किराणा स्टोअर्स आणि आणखी एका कंपनीद्वारे बनावट आयात करण्यात आली. यात सरकारला अंदाजे ४४ कोटींहून अधिक महसुलाचे नुकसान झाल्याचे सांगण्यात येत आहे.

जामिनाला विरोध
डीआरआयने पुरावे नष्ट होण्याच्या भीतीने अटकपूर्व जामिनाला विरोध केला. मात्र आरोपीची गुन्हेगारी पार्श्वभूमी नसल्याने पुरावे नष्ट होण्याची शक्यता कमी असल्याचे कोर्टाने निरीक्षण नोंदवले. तसेच पुढील चौकशी वकिलाच्या उपस्थितीत आणि व्हिडिओग्राफीसह करण्याचे निर्देश दिले. शिवाय तपासात पूर्ण सहकार्य अनिवार्य असल्याचेही सांगितले.