दादरमध्ये कबुतरखान्यावरून तणाव

पक्षिप्रेमींसह जैन समाज आक्रमक; आच्छादन हटवले

सकाळ वृत्तसेवा
मुंबई, ता. ६ : दादर येथील कबुतरखान्यावर महापालिकेने केलेल्या कारवाईनंतर जैन समाज आणि पक्षिप्रेमी आक्रमक झाले आहेत. बुधवारी सकाळी केलेल्या आंदोलनादरम्यान कबुतरखान्यावर लावलेले ताडपत्रीचे आच्छादन फाडून बांबूला बांधलेली सुतळी सुरीने कापून टाकून तो खुला करण्यात आला. पोलिसांनी आंदोलकांना रोखण्याचा प्रयत्न केल्याने परिसरात तणाव निर्माण झाला होता. तासभर हे आंदोलन सुरू होते. दरम्यान, उच्च न्यायालयाने दिलेल्या आदेशांचे पालन केले जाईल, अशी भूमिका पालिकेने स्पष्‍ट केली.

मुख्यमंत्री देवेंद्र फडणवीस यांनी मंत्रालयात कबुतरखान्यासंदर्भात बैठक घेतली होती. उपमुख्यमंत्री अजित पवार, वनमंत्री गणेश नाईक, मंत्री गिरीश महाजन, मंगलप्रभात लोढा, आमदार कालिदास कोळंबकर, महापालिका आयुक्त भूषण गगराणी आणि वन विभागाचे अप्पर मुख्य सचिव मिलिंद म्हैसकर आदी या बैठकीला उपस्थित होते. या बैठकीत मुख्यमंत्री देवेंद्र फडणवीस यांनी कबुतरखान्यासाठी पर्यायी व्यवस्था होईपर्यंत कबुतरांना नियंत्रित खाद्यपुरवठा सुरू ठेवावा, असे आदेश पालिकेला दिले होते. महापालिकेने दादर कबुतरखाना ताडपत्रीने झाकून बंद केल्यानंतर जैन समाज नाराज झाला होता. मंत्री मंगलप्रभात लोढा यांनीही दादर कबुतरखाना बंद होऊ नये, यासाठी मुख्यमंत्र्यांकडे मध्यस्तीची भूमिका घेतली होती. त्यामुळे नियोजित आंदोलन स्थगित करण्यात आल्याचे सांगण्यात आले; मात्र अचानक सकाळी १०.३०च्या दरम्यान शेकडो आंदोलक कबुतरखान्याच्या परिसरात जमा झाले आणि त्यांनी आंदोलन करून कबुतरखान्यावरील ताडपत्री फाडून टाकली. ताडपत्री काढून टाकताच पक्षिप्रेमी विरुद्ध तिथे उपस्थित असलेले पालिका कर्मचारी, सामान्य नागरिक आणि स्थानिक यांच्यात जोरदार वाद सुरू झाला. त्यानंतर घोषणाबाजी सुरू झाली. तणावाची स्थिती होताना पोलिसांना हस्तक्षेप करावा लागला.
----------
उच्च न्यायालयाच्या आदेशानंतर पालिकेच्या वतीने कबुतरखान्याभोवती ताडपत्री लावण्यात आली आहे. ही ताडपत्री काही पक्षिप्रेमींनी काढून टाकली. हा प्रकार न्यायालयाच्या आदेशाचे उल्लंघन आहे. न्यायालयाच्या आदेशाचे आम्ही पालन करू.
- भूषण गगराणी, आयुक्त, मुंबई महापालिका
-------------
पोलिस म्हणतात, पालिकेची तक्रार हवी!
कबुतरखाना येथील आंदोलनाची नोंद दादर पोलिसांनी घेतली आहे. गुरुवारी याविषयी उच्च न्यायालयात सुनावणी आहे. निकड भासल्यास या नोंदी न्यायालयासमोर ठेवल्या जातील. शिवाय हे प्रकरण न्यायप्रविष्ठ असून, महापालिका त्यात प्रतिवादी आहे. न्यायालयाच्या आदेशानुसार पालिकेने हा कबुतरखाना बंद केला होता. त्यामुळे बुधवारी न्यायालयाचे आदेश धुडकावून हट्टाने कबुतरखाना खुला करणाऱ्या जमावाबाबत पालिकेने तक्रार करणे अपेक्षित आहे, अशी माहिती एका वरिष्ठ पोलिस अधिकाऱ्याने दिली.
---------------------