चेंबूरमधील पदपथावर अनधिकृत फेरीवाल्यांचा कब्जा
चेंबूर, ता. ७ (बातमीदार) ः चेंबूर रेल्वेस्थानक व डॉ. बाबासाहेब आंबेडकर उद्यान पदपथाला अनधिकृत फेरीवाल्‍यांचा विळखा बसला आहे,
त्यामुळे प्रवाशांना रस्त्यावरून चालावे लागत आहे.
चेंबूर रेल्वेस्थानक परिसर, टेम्बे पूल, मल्हार हॉटेल व डॉ. बाबासाहेब आंबेडकर उद्यानाजवळील पदपथावर बेकायदा फेरीवाल्‍यांनी बस्तान मांडले आहे. पालिका एम पश्चिम कार्यालयाकडून कोणतीही कारवाई होत नसल्याने फेरीवाल्यांचे प्रमाण वाढले आहे. डॉ. बाबासाहेब आंबेडकर उद्यानाशेजारी अदाणी वीज कार्यालय, बुद्धविहार, जनरल एज्युकेशन स्‍कूल, ओएलपीएस स्‍कूल, सेंट अँथोनी स्‍कूल, पालिका एम पश्चिम कार्यालय, पालिकेचे जलतरण तलाव आहे. त्यामुळे या परिसरात मोठी रहदारी असते. ज्‍येष्‍ठ नागरिक, विद्यार्थी, महिला, गरोदर महिला, अपंग व्यक्तींना रस्त्यावरून चालावे लागत आहे. पालिकेचे कार्यालय हाकेच्या अंतरावर असतानादेखील पालिका प्रशासन बघ्याची भूमिका घेत असल्याचा आरोप प्रवाशांनी केला आहे.