मुलुंडकरांची गैरसोय दूर होणार
रखडलेल्‍या पूर्व-पश्‍चिम पादचारी पुलाचे काम सुरू
मुलुंड, ता. ७ (बातमीदार) ः मुलुंड पूर्व-पश्चिमेला जोडणाऱ्या ५० वर्षे जुन्या पादचारी पुलाचे काम सुरू झाल्‍याने मुलुंडकरांची गैरसोय दूर होणार आहे. गेल्‍या वर्षभरापासून रखडलेल्‍या पादचारी पुलाचे काम सुरू करावे, यासाठी स्‍थानिकांनी पालिकेकडे मागणी केली होती. अखेर बुधवारपासून (ता. ६) या पुलाचे काम रेल्‍वेने सुरू केले आहे.
पादचारी पूल जीर्ण झाल्यामुळे पाडण्यात आला आणि नवीन पूल बांधण्यास सुरुवात करण्यात आली. पुलाचे काम पूर्ण होण्यासाठी ३१ डिसेंबर २०२४, ३१ मे २०२५ अशा अनेक तारखा देण्यात आल्या, परंतु आजही पुलाचे काम अपूर्ण आहे. हा पूल रेल्वे लाईन ओलांडत असल्यामुळे रेल्वेतर्फे याचे बांधकाम आणि देखभाल केली जाते. मुंबई महापालिका त्यासाठी रेल्वेकडे पैसे जमा करते. याबाबत रेल्वे प्रशासनाकडे चौकशी केली असता, त्यांनी मुंबई महापालिका या कामासाठी निधी देत नसल्याचे सांगितले. या पुलाच्या बांधकामासाठी एकूण १२ कोटी ४४ लाख रुपये खर्च येणार आहे. त्यातील तीन कोटी रुपये मुंबई महापालिकेने रेल्वेला दिलेले आहेत. त्‍यानुसार या पुलाचे बांधकाम सुरू करण्यात आले आहे.

नागरिकांना मुलुंड पूर्वेतून पश्चिमेकडे जाताना रेल्वेच्या पादचारी पुलाचा वापर करावा लागतो. मात्र पुलावर तिकीट तपासनीस नागरिकांकडून दंड वसूल करतात. परिणामी नागरिकांना हा अनावश्यक आर्थिक भुर्दंड सोसावा लागत आहे. या पुलासाठी पाठपुरावा करणारे मुलुंडमधील सामाजिक कार्यकर्ते सागर देवरे यांनी सोमवारी (ता. ४) अतिरिक्‍त आयुक्‍तांची भेेट घेऊन पुलाचे काम लवकरात लवकर करावे, अशी मागणी केली आहे.

कामात नियोजनाचा अभाव
पादचारी पूल पाडताना पर्यायी पुलाची व्यवस्‍था केली असती तर ही परिस्‍थिती उद्‌भवली नसती, असे प्रवाशांचे म्‍हणणे आहे. काही वर्षांपूर्वी या पुलाचा एक मोठा भाग कोसळला होता. मात्र सुदैवाने नागरिकांची वर्दळ पुलावर नव्हती. परिणामी जीवितहानी झाली नाही. त्‍यानंतर पुलाची दुरुस्ती करण्यात आली.

४० पैकी २४ गर्डर पूर्ण
हा पूल २०२४मध्ये पाडण्यात आला. त्‍यानंतर या पुलाचे ५० टक्‍के काम पूर्ण झाले असून, नवीन पुलासाठी लागणाऱ्या ४० गर्डरपैकी २४ गर्डर बांधून पूर्ण झालेले आहेत. उर्वरित काम मात्र निधीअभावी रखडले होते.