खारघर, ता. ९ (बातमीदार) : रक्षाबंधनाच्या दिवशी भावाला राखी बांधण्यासाठी तळोजा कारागृहात मोठ्या प्रमाणात बहिणींनी गर्दी केली होती, मात्र कारागृह नियमानुसार भावाला काचेआडच संपर्क साधून रक्षाबंधन साजरा करावा लागला, पण सणानिमित्त भावाशी संवाद साधल्याच्या समाधानाने कारागृहातून बाहेर पडणाऱ्या बहिणींच्या डोळ्यांत प्रेमाचे अश्रू तरळत होते.
बहीण-भावाचा पवित्र सण असलेल्या रक्षाबंधनासाठी सकाळी ७ वाजल्यापासून तळोजा मध्यवर्ती कारागृहाच्या प्रवेशद्वारावर महिलांनी गर्दी केली होती. या महिलांना टोकन क्रमांक देऊन साधारण आठच्या सुमारास कारागृहात सोडण्यात आले. या वेळी काचेपलीकडे असलेल्या भावाला खिडकीद्वारे राखी देताना दूरध्वनीद्वारे संपर्क साधून बहिणींनी आपल्या भावना व्यक्त केल्या. प्रतीक्षालयात भावाला भेटण्यासाठीची तगमग आणि बाहेर पडताना डोळ्यांतील आनंदाश्रू सर्वकाही सांगत होते.
-----------------------------------
प्रत्यक्ष भेट नसल्याची खंत
मुंबईवरून आलेल्या गौरी तुपारे यांचा भाऊ महिनाभरापासून कारागृहात आहे. काचेआड असलेल्या भावाला दूरध्वनीवर संपर्क साधावा लागला. तोंड गोड करण्यासाठी पेढे आणले होते, मात्र मनाईमुळे माघारी घेऊन जावे लागत असल्याचे सांगितले. तर ठाणे विठावा येथील रिची माटे यांनी भावाला राखी देता आली, मात्र प्रत्यक्ष भेट झाली नसल्याचे दुःख असल्याचे सांगितले.
-------------------------------------
कथा, कादंबऱ्या पुस्तकांची भेट
जीवन विद्या मिशन आणि पनवेल इनरव्हील क्लबच्या सदस्यांनी कारागृहात कैद्यांना राखी बांधून रक्षाबंधनदिन साजरा केला. या वेळी जीवन विद्या मिशनकडून विश्व प्रार्थना करताना कारागृहातून बाहेर पडल्यावर समाज घडवण्याचे काम करा, असा सल्ला दिला, तर इनरव्हील क्लबच्या पदाधिकाऱ्यांनी कारागृहातील कैद्यांना दीडशेहून अधिक कथा, कादंबऱ्या पुस्तकांची भेट दिली.