मुरबाड, ता. ९ (वार्ताहर) : तालुक्यात मागील महिन्यात तोंडली आणि धसई या दोन ठिकाणी सलग घडलेल्या दरोड्यांच्या प्रकरणात सहभागी असलेले सराईत गुन्हेगार अखेर रायगड पोलिसांच्या जाळ्यात अडकले आहेत. ठाणे पोलिसांना या टोळीचा शोध लागला नव्हता; परंतु रायगड जिल्ह्यातील पाली येथे अशाच प्रकारचा दरोडा घातल्याने या आरोपींपर्यंत पोलिस पोहोचले. या यशस्वी कारवाईमुळे मुरबाडसह परिसरातील नागरिकांनी सुटकेचा निश्वास सोडला आहे.
तोंडली येथील मोतीराम पष्टे यांच्या घरात १६ जूनला रात्रीच्या सुमारास सात ते आठ सशस्त्र दरोडेखोर घुसले. त्यांनी शस्त्राचा धाक दाखवत घरातील रोख रक्कम आणि सोन्याचे दागिने मिळून सात ते आठ लाख रुपयांचा ऐवज लुटून पोबारा केला. ही घटना ताजी असतानाच आठ दिवसांनी धसई येथे जगदीश गोल्हे यांच्या घरावरही दरोडा पडला. दोन्ही प्रकरणांत गुन्ह्याची पद्धत एकसारखी असल्याने हीच टोळी असावी, असा पोलिसांना संशय होता.
रायगड जिल्ह्यातील पाली पोलिस ठाण्याच्या हद्दीतही अशाच प्रकारचा दरोडा २७ जुलै घडला. रायगडचे पोलिस अधीक्षक आँचल दलाल यांनी हे आव्हान स्वीकारून दहा पथके तयार केली. आरोपींचा माग काढण्यासाठी तांत्रिक विश्लेषण व गुप्त माहिती संकलन सुरू केले. आरोपी वेगवेगळ्या ठिकाणी वास्तव्य करत असल्याने आणखी पाच पथके तयार करण्यात आली. सलग आठ-दहा दिवसांच्या तपासानंतर अजय चव्हाण (२३, गेवराई, बीड), आकाश चव्हाण (२०, फुलंब्री, संभाजीनगर), सुनील चव्हाण (३२, गेवराई, बीड), मल्हारी चव्हाण (३०, जामनेर, जळगाव), सोमनाथ चव्हाण (३०, जामनेर, जळगाव) आणि सुजल चव्हाण (इंदापूर, पुणे) या सहा आरोपींना अटक करण्यात आली.
तपासात उघड झाले की हे आरोपी गावोगावी टेम्पोने भाजी विकणाऱ्या चालकाच्या नावाखाली दरोड्याचे ठिकाण शोधत असत. या टोळीतील टेम्पोचालक अद्याप फरार असून त्याचा शोध सुरू आहे.

भूतकाळातील गुन्हेगारी
अटक आरोपी सराईत गुन्हेगार असून, त्यांनी यापूर्वी मुंबई, जेजुरी, नाशिक, सातारा, परभणी, पेण, बुलढाणा आणि इतर ठिकाणी दरोडे टाकल्याचे निष्पन्न झाले आहे. त्या ठिकाणच्या पोलिसांना मात्र यांचा पत्ता लागला नव्हता. रायगड पोलिसांनी केवळ आठ दिवसांत या टोळीचा छडा लावून त्यांना जेरबंद केल्याने रायगड पोलिस अधीक्षक आँचल दलाल आणि त्यांच्या पथकाचे सर्वत्र कौतुक होत आहे.