मनोरुग्‍णालयात रक्षाबंधन साजरे
मुलुंड, ता. ९ (बातमीदार) ः मुलुंडचे सामाजिक कार्यकर्ते आणि शिवसेना ठाकरे गटाचे शाखा समन्वयक अभिजित कमलाकर चव्हाण यांच्यामार्फत विठाई प्रतिष्ठान यांनी मुलुंडच्या सीमेवरील प्रादेशिक मनोरुग्णालय येथे रक्षाबंधनाचा कार्यक्रम आयोजित केला होता. यंदाचे रक्षाबंधनाचे १९वे वर्ष होते. कार्यक्रमाला आनंद विश्व गुरुकुलचे, राष्ट्रीय सेवा योजनेचे ५० विद्यार्थी उपस्थित होते. या वेळी विठाई प्रतिष्ठानचे अध्यक्ष अभिजित चव्हाण म्हणाले, की हा कार्यक्रम साजरा केल्याने आम्हाला आमच्या पुढील आयुष्यामध्ये एक वेगळी शक्ती, ऊर्जा मिळते. येथील लोक स्‍वतःच्या घरी जाऊन सण साजरे करू शकत नसल्यामुळे आम्ही रक्षाबंधनाचा कार्यक्रम गेल्‍या अनेक वर्षांपासून साजरा करतो, असे त्‍यांनी सांगितले. रुग्णालयाच्या उपअधीक्षक डॉ. ममता यांनीसुद्धा विठाई प्रतिष्ठानचे आभार मानून हा कार्यक्रम आयोजित केल्‍याबद्दल आभार मानले. असे सामाजिक उपक्रम व हिंदू सणांची जनजागृती मनोरुग्णालयामध्ये होणे गरजेचे आहे, असे उपअधीक्षक ममता यांनी सांगितले.