अधिकृत कृषी केंद्रांवरून खत खरेदी करण्याचे आवाहन
मुरूड, ता. ११ (वार्ताहर) ः रायगड जिल्ह्यात खरीप हंगामात भात हे प्रमुख पीक घेतले जाते. सद्यःस्थितीत बहुतेक भागात भातलागवड पूर्ण झाली असून, पिके वाढीच्या टप्प्यात आहेत. या अवस्थेत खताची आवश्यकता वाढत असताना, जिल्हा अधीक्षक कृषी अधिकारी वंदना शिंदे यांनी शेतकऱ्यांना फक्त अधिकृत कृषी केंद्र धारकांकडूनच खत खरेदी करण्याचे आवाहन केले आहे.
शेतकऱ्यांनी खत खरेदी करताना सरकारने निश्चित केलेल्या दरातच खरेदी करावी आणि खरेदीचे पक्के बिल किंवा पावती संबंधित विक्रेत्याकडून घ्यावी. जर कोणत्याही कृषी केंद्रात जास्त दर आकारणे, बेकायदेशीर विक्री किंवा इतर गैरप्रकार आढळल्यास, शेतकऱ्यांनी त्वरित तालुका कृषी अधिकारी किंवा जिल्हा अधीक्षक कृषी अधिकारी कार्यालयाशी संपर्क साधून तक्रार नोंदवावी, असेही त्यांनी सांगितले. मागील काही दिवसांत पेण, अलिबाग, उरण व पनवेल तालुक्यांमध्ये युरिया खताच्या संभाव्य टंचाईबाबत शेतकऱ्यांत चिंता निर्माण झाली होती, परंतु आता ती चिंता करण्याची गरज नसल्याचे कृषी विभागाने स्पष्ट केले आहे. खरीप हंगाम (१ एप्रिल ते ३० सप्टेंबर) कालावधीसाठी रायगड जिल्ह्यास एकूण ११,९३१ मेट्रिक टन युरिया खताचे आवंटन मंजूर आहे. १ एप्रिलपासून आतापर्यंत ९,१५० मेट्रिक टन युरिया आणि बफर स्टॉकमधून ६९८ मेट्रिक टन असा एकूण ९, ८४८ मेट्रिक टन खताचा पुरवठा झाला आहे. फक्त १ ऑगस्ट ते ७ ऑगस्ट या सात दिवसांतच ७९० मेट्रिक टन युरिया खताचा पुरवठा आरसीएफ कंपनीमार्फत करण्यात आला आहे. पुढील काळातही नियमित पुरवठा सुरू राहील, अशी माहिती कृषी विभाग व आरसीएफ प्रतिनिधींनी दिली.