कासा, ता. ११ (बातमीदार) : डहाणू-नाशिक राज्यमार्गावरील चारोटी ते वरोतीपर्यंतचा रस्ता मोठमोठ्या खड्ड्यांनी पोखरला असून, वाहनचालकांचे हाल होत आहेत. पावसाळ्यात दरवर्षीप्रमाणे यंदाही अनेक ठिकाणी गटारे नसल्याने पाणी रस्त्यावर साचून मोठे खड्डे निर्माण झाले आहेत. गायकवाड पाडा, कासा केंद्र, भिसे विद्यालयासमोर, तसेच वरोती परिसरात रस्त्याची अवस्था दयनीय झाली आहे.

काही दिवसांपूर्वी तात्पुरते खडी टाकून खड्डे बुजवण्यात आले होते. पाऊस थांबल्यावर डांबरीकरण करू, असे बांधकाम विभागाने सांगितले असले तरी अद्याप काम झालेले नाही. हा राज्यमार्ग असल्याने दररोज मोठ्या प्रमाणात जड वाहने, भाजीपाला वाहतूक करणाऱ्या गाड्या, तसेच गुजरात, ठाणे, भिवंडी, सिल्व्हासामार्गे जाणारी वाहतूक याच मार्गाने होते.

कासा बाजारपेठेत सणासुदीच्या खरेदीसाठी मोठी गर्दी होत असल्याने अपघाताचा धोका वाढला आहे. याच मार्गावर गंजाड आणि कासा येथे बाजारपेठ असल्याने या खड्ड्यांमुळे नागरिक त्रस्त आहेत. सण, उत्सवांना नागरिक मोठ्या प्रमाणात खरेदीसाठी गर्दी करतात. त्यांना रस्त्यावरील खड्ड्यांमुळे धोकादायक प्रवास करावा लागतो.

गणेशोत्सवापूर्वी रस्त्याची दुरुस्ती
गणेशोत्सवाला अवघे १५ दिवस राहिले असताना या मार्गावरून जाणाऱ्या भाविकांना खड्ड्यांतून प्रवास करावा लागू नये, यासाठी तातडीने दुरुस्ती करावी, अशी मागणी नागरिकांकडून होत आहे. बांधकाम विभागाचे अभियंता सचिन गायकवाड यांनी सांगितले की, गणेशोत्सवापूर्वी या रस्त्याची दुरुस्ती करण्याचे प्रयत्न सुरू आहेत.

गेल्या अनेक दिवसांपासून रस्त्यावर मोठमोठे खड्डे पडले आहेत. गणेशोत्सव अगदी जवळ आल्याने तातडीने दुरुस्ती व्हावी, नाहीतर यावर्षीही गणपती बाप्पाचे आगमन खड्ड्यांतूनच होईल.
- हरीश मुकणे, उपसरपंच, कासा