फळ बाजाराचे बांधकाम धोक्याच्या दिशेने
डागडुजी करण्याची बाजार घटकांची मागणी
तुर्भे, ता. ११ (बातमीदार) : मुंबई कृषी उत्पन्न बाजार समितीमधील फळ बाजार इमारतीचे बांधकाम आता धोकादायक होऊ लागले आहे. फळ बाजारच्या इमारतीच्या स्लॅबचे प्लास्टर निखळले असून, पिलरही कमकुवत झाले आहेत. त्यामुळे हे बांधकाम कोणत्याही क्षणी कोसळण्याची भीती बाजार घटकांना वाटू लागली आहे. परिणामी बाजार समितीने या इमारतीची डागडुजी करावी, अशी मागणी जोर धरू लागली आहे.
फळ बाजाराच्या इमारतीची उभारणी १९९०च्या सुमारास झाली होती. फळ बाजारात एकूण एक हजार २९ गाळे असून, स्वतंत्र लिलावगृहही आहे. आता तर नव्याने सेंट्रल फॅसिलिटी इमारत उभारण्यात आली आहे. मात्र जुन्या व्यापारी गाळ्यांची बांधकामे आता जीर्ण झाली असून, गाळ्यातील छताचे प्लास्टरही निखळायला सुरुवात झाली आहे. अनेक ठिकाणी भिंती आणि पिलरला तडे गेले आहेत. अनेक ठिकाणी सळ्या बाहेर डोकावत असल्याचे पाहायला मिळत आहे. बाजारात या स्लॅबचे प्लास्टर निखळल्याच्या घटनाही घडल्या असून, फळ बाजाराच्या पुनर्बांधणीची गरज अधोरेखित केली आहे.

गाळ्यांवर अनधिकृत बांधकामे
विशेष म्हणजे फळ बाजारात अनेक व्यापाऱ्यांनी अनधिकृतपणे गाळ्यांवर बांधकामे केली आहेत. ही बांधकामे एकमजली असून, तिथे व्यापाऱ्यांची कार्यालये आहेत. त्या ठिकाणी कामगार राहतात. व्यापाऱ्यांनी आपल्या गाळ्यांवर बांधकामे केली आहेत. मात्र गाळ्यांच्या पॅसेजमधील स्लॅबचे, त्यांना जोडणाऱ्या पिलरची डागडुजी मात्र केलेली दिसत नाही. या पॅसेजमधून ये-जा करणाऱ्यांची संख्या मोठी आहे. यामुळे येथे दुर्घटना होण्याची भीती वर्तविण्यात येते. त्यामुळे या भागाची डागडुजी करण्याची मागणी बाजार घटक करीत आहेत. बाजारात वर्दळ वाढली आहे.

६८ लाख रुपये खर्च
फळ बाजारात मागे पिलरच्या डागडुजीचे काम सुरू करण्यात आले होते. त्यासाठी ६८ लाख रुपये खर्च केले होते. मात्र असे असूनही धोकादायक बांधकाम बाजारात कायम आहे. याची बाजार समितीने योग्य दखल घेण्याची मागणी बाजार घटक करीत आहेत.