अंबरनाथ, ता. ११ (वार्ताहर) : अंबरनाथ पूर्वेतील लोकनगरी परिसरात भरधाव वेगात येणाऱ्या बोलेरो गाडीने दुचाकीला मागून धडक दिल्याने पती-पत्नी जखमी झाले. हा अपघात शनिवारी (ता. ९) सायंकाळी सव्वासहाच्या सुमारास घडला. धडक दिल्यानंतर चालकाने मदत न करता घटनास्थळावरून पळ काढला.
अक्षय मालुसरे (वय २७) आणि त्यांची पत्नी पूजा मालुसरे हे दुचाकीवरून जात होते. वैभव पेट्रोल पंपाजवळ पांढऱ्या रंगाच्या चारचाकीने दुचाकीला मागून धडक दिली. या धडकेत पती-पत्नी दोघेही जखमी झाले. धडक झाल्यानंतर चालक घटनास्थळावरून फरार झाला. जखमी अक्षय यांनी दिलेल्या फिर्यादीवरून शिवाजीनगर पोलिसांनी चालकाविरुद्ध गुन्हा दाखल केला आहे. या प्रकरणी गुन्हा दाखल करण्यात आला असून पोलिस आरोपीचा शोध घेत आहेत.