पालिका शाळेच्या मुख्य प्रवेशद्वारावर कचऱ्याचे डबे
धारावी, ता. ११ (बातमीदार) : धारावीतील महात्मा गांधी रस्त्यावर असलेल्या पालिकेच्या ट्रान्झिस्‍ट कॅम्प शाळा पाचमजली इमारतीत भरते. शाळेत मराठी, उर्दू, हिंदी आदी विविध माध्यमांतून सकाळ व दुपार अशा दोन अधिवेशनात शिक्षण दिले जात असल्याने शाळेची पटसंख्या मोठी आहे. शेकडो विद्यार्थी शिक्षण घेण्यासाठी येतात. त्यामुळे शाळा भरताना व सुटताना विद्यार्थ्यांची मोठी गर्दी असते. शाळेत जाण्यासाठी असलेल्या मुख्य प्रवेशद्वाराजवळ पालिकेचे कचऱ्याने भरलेले डबे ठेवल्याने प्रवेशद्वारात दुर्गंधी निर्माण झाली आहे.
दुर्गंधीमुळे नाकाला रुमाल लावूनच विद्यार्थ्यांना प्रवेशद्वारातून आत जावे लागते. पालिकेच्या शाळेत गोरगरीब कुटुंबातील विद्यार्थी शिक्षण घेण्यासाठी येतात. कचऱ्याच्या दुर्गंधीमुळे रोगराई वाढण्याची भीती व्यक्त करण्यात येत आहे. पावसाळ्याचे आजार वाढत असताना लहान मुलांना आजाराची भीती निर्माण झाली आहे. पालिकेने त्वरित कचऱ्याचे डबे हटवावेत, अशी मागणी पालक करीत आहेत.