सानपाडा स्थानकाबाहेरील रस्त्याच्या दुरुस्तीस सुरुवात
तुर्भे, ता. ११ (बातमीदार) ः सानपाडा रेल्वेस्थानकाबाहेरील रिक्षा स्टँड परिसरातील रस्त्याची दुरवस्था झाली होती. तसेच पावसामुळे रस्‍त्‍यावर खड्डे पडले होते. त्‍यामुळे पादचाऱ्यांसह वाहनचालकांना कसरत करावी लागत होती. अखेर सिडकोने दुरुस्तीचे काम हाती घेतले आहे.
सानपाडा रेल्वेस्थानक व सेक्टर-३० बसस्थानकादरम्यानचा रस्ता आणि पदपथ पावसाळ्यात चांगलाच उखडला होता. वारंवार खड्डे पडून पावसाचे पाणी साचल्याने दररोज हजारो प्रवाशांना बस व रिक्षा पकडताना तारेवरची कसरत करावी लागत होती. दीड महिन्यापूर्वीच येथे सिडकोकडून डांबरीकरण झाले होते; परंतु अवघ्या आठवड्यातच खड्डे निर्माण झाल्याने प्रवाशांचा संताप उसळला. निकृष्ट दर्जाच्या कामावर टीका होत असताना, मनसे सानपाडा विभाग अध्यक्ष योगेश शेटे यांनी २४ जुलै रोजी सिडकोचे कार्यकारी अभियंता आर. एन. दिवेकर यांची भेट घेऊन लेखी निवेदन दिले. या भेटीला महाराष्ट्र सैनिक शशिकांत गायकवाड उपस्थित होते. या वेळी रस्त्याची व पदपथाची तातडीने सुधारणा न झाल्यास ‘मनसे स्टाईल’ जनआंदोलन उभारण्याचा इशारा देण्यात आला होता. तसेच सिडकोच्या अखत्यारीतील या कामात झालेल्या हलगर्जीमुळे नागरिकांची प्रचंड गैरसोय होत असल्याचे स्पष्ट करण्यात आले. या पाठपुराव्याचा परिणाम म्हणून रिक्षा स्टँड परिसरातील रस्त्याच्या दुरुस्तीला सुरुवात झाली आहे.