स्वातंत्र्यदिनानिमित्त खादीच्या राष्ट्रध्वजाला मागणी
जीवन तांबे ः सकाळ वृत्तसेवा
स्‍वातंत्र्यदिनानिमित्त बाजारात विविध आकारांचे राष्ट्रध्वज विक्रीला आले आहेत. पॉलिस्टर राष्ट्रध्वजाच्या किमती कमी असल्या तरी खादीच्या राष्ट्रध्वजाला सर्वाधिक मागणी असल्‍याचे लालबागमधील दुकानदारांनी सांगितले.
सिंदूर ऑपरेशनमुळे यंदा १,००० पेक्षा अधिक खादीच्या ध्वजांची विक्री झाल्‍याचे येथील विक्रेते सागर पारेख यांनी सांगितले. मुंबईसह नवी मुंबई, ठाणे येथे ध्वज पाठवण्यात आले आहेत.

स्‍वातंत्र्यदिनानिमित्त १५ ऑगस्‍ट रोजी सरकारी कार्यालयापासून ते गावाखेड्यांतील ग्रामपंचायती,
शाळा, महाविद्यालये, व्यावसायिक दुकाने, इमारतीत, वस्त्यांमध्ये राष्ट्रीय तिरंग्याचे ध्वजारोहण करण्यात येते. यासाठी खादीचे राष्‍ट्रध्वज खरेदी केले जातात. यंदा खादीचे तिरंगा राष्ट्रध्वज हे नांदेड ग्राम उद्योग समिती, म्हैसूर, धारवाड, कर्नाटक, पश्चिम बंगाल, हावडा राज्यातून लालबागमधील दुकानांमध्ये विक्रीसाठी दाखल झाले आहेत.
विविध आकारांचे स्वस्त असे पॉलिस्टर कपड्याचे तिरंगा, रेशीम ध्वज, तिरंगा मफलर, फेटे, लहान मुले व मुलींचे ड्रेस, लहान शाल, ओढणी, तिरंगा साडी, लहान मोठे आकाराचे तिरंगा टी-शर्ट, रिबन बाजारात विक्रीला आले आहेत. बच्चेकंपनीला याची भुरळ पडली आहे.

पॉलिस्टर राष्ट्रध्वजाचे दर कमी असले तरी खादी राष्ट्रध्वज खरेदी करून आमच्या कार्यालयासमोर फडकवतो. मोठ्या धूमधडाक्यात स्वातंत्र्यदिन आम्ही साजरा करतो.
- अभिमान जगताप, ग्राहक

भारतीय लोकांचे राष्ट्रध्वजावरील प्रेम आणि ‘हर घर तिरंगा’ अभियानामुळे स्वातंत्र्यदिन व प्रजासत्ताकदिनाला पॉलिस्टर राष्ट्रध्वजाप्रमाणे खादीच्या राष्ट्रध्वजाची मोठी विक्री होते.
- सागर पारेख,
मालक पारेख ब्रदर्स- लालबाग

खादी तिरंगा ध्वज दर
२ फूट ३ इंच - ७०० ते १००० रुपये
४ फूट ६ इंच - १,२०० ते ३,००० रुपये
६ फूट ४ इंच - २,६०० रुपये

पॉलिस्टर लहान ध्वज अंदाजे किंमत २५० ते ३०० रुपये
लाकडी काठी ध्वज किंमत ६ ते १० रुपये

लहान ध्वज किंमत १५ रु
रस्सी - ५० फूट ८० रुपये