घरोघरी तिरंगा मोहिमेंतर्गत सार्वजनिक स्थळांची स्वच्छता
नेरूळ, ता. ११ (बातमीदार) ः तिरंग्याविषयीचा राष्ट्राभिमान जागृत करणाऱ्या घरोघरी तिरंगा अर्थात हर घर तिरंगा मोहिमेंतर्गत सोमवारी (ता. १) विविध विभागांमध्ये महापालिका आयुक्त डॉ. कैलास शिंदे यांच्या मार्गदर्शनाखाली लोकसहभागातून विशेष स्वच्छता मोहीम राबविण्यात आली. ही मोहीम अतिरिक्त आयुक्त सुनील पवार यांच्या नियंत्रणाखाली आणि घनकचरा व्यवस्थापन विभागाचे उपायुक्त डॉ. अजय गडदे व स्मिता काळे आणि परिमंडळ एक उपायुक्त सोमनाथ पोटरे व परिमंडळ दोन उपायुक्त संजय शिंदे व मुख्य स्वच्छता अधिकारी राजेंद्र इंगळे यांच्या निरीक्षणाखाली राबविण्यात आली.
यामध्ये बेलापूर व नेरूळ विभागांनी संयुक्तपणे ज्वेल ऑफ नवी मुंबई परिसरात बेलापूर विभागाचे सहाय्यक आयुक्त डॉ. अमोल पालवे व नेरूळ विभागाचे सहाय्यक आयुक्त जयंत जावडेकर तसेच बेलापूर विभागाचे स्वच्छता अधिकारी नरेश अंधेर व नेरूळ विभागाचे स्वच्छता अधिकारी अरूण पाटील यांच्या नियंत्रणाखाली प्रभावी रितीने मोहीम राबवण्यात आली. या मोहिमेमध्ये ५२ गोणी कचरा संकलित करण्यात आला. यामध्ये एसआयईएस महाविद्यालयाचे एनएसएस युनिटचे विद्यार्थी, नागरिक तसेच स्वच्छताकर्मी सहभागी होते.
वाशी विभागातही सहाय्यक आयुक्त सुखदेव येडवे व स्वच्छता अधिकारी जयश्री आढळ यांच्या माध्यमातून वाशी मिनी सीशोअर जुहूगाव चौपाटी परिसरात टिळक कॉलेजचे एनएसएस विद्यार्थी यांच्या सहयोगातून सखोल स्वच्छता मोहीम राबविण्यात आली. यामध्ये स्वच्छताकर्मींसोबत नागरिकही सहभागी झाले होते.
तुर्भे विभागात सेक्टर-१० सानपाडा येथील ट्री बेल्ट परिसरात सहाय्यक आयुक्त सागर मोरे व स्वच्छता अधिकारी जयेश पाटील यांच्या नियंत्रणाखाली राबविलेल्या स्वच्छता मोहिमेत पिल्लाई कॉलेजच्या विद्यार्थ्यांनी उत्साहाने सहभाग घेतला.
या मोहिमेत प्राधान्याने प्लॅस्टिक बाटल्या, रॅपर्स, प्लॅस्टिक पिशव्या व सिंगल यूज प्लॅस्टिक, कापड, कागद अशा स्वरूपाचा कचरा संकलित करण्यात आला व गोण्यांमध्ये भरून पालिकेच्या घनकचरा व्यवस्थापन प्रकल्पस्थळी वाहून नेण्यात आला. या वेळी स्वच्छतेची सामूहिक शपथ ग्रहण करण्यात आली.