पालिका निवडणुकीपूर्वी
बांधणार बेलासिस पूल

३१ डिसेंबरपर्यंत काम पूर्ण करण्याचे लक्ष्य
सकाळ वृत्तसेवा
मुंबई, ता. ११ : ताडदेव-नागपाडा आणि मुंबई सेंट्रल स्‍थानकाला जोडणाऱ्या बेलासिस उड्डाणपुलाच्‍या पुनर्बांधणीला वेग आला आहे. पुलाचे रेल्वे हद्दीतील काम पश्चिम रेल्वे करीत असून, पुलाचे पोहोच रस्ते मुंबई महापालिका करीत आहे.  याअंतर्गत पहिल्‍या टप्‍प्‍यात रेल्वे कंत्राटदाराने ३६ मीटर स्‍पॅनच्‍या एकूण १२ तुळया बसविण्याची कार्यवाही नुकतीच पूर्ण केली आहे. बेलासिस पुलाचे बांधकाम नियोजित कालावधीपूर्वी म्‍हणजेच ३१ डिसेंबरपर्यंत महापालिका निवडणुकीच्या आधी करण्‍याचे पालिकेचे लक्ष्य आहे. 

मुंबई सेंट्रल स्‍थानकानजीक रेल्वे मार्गावर केबलआधारित पूल उभारण्यासाठी पालिका, एमएमआरडीए यांनी महाराष्ट्र रेल्वे इन्फ्रास्ट्रक्चर डेव्हलपमेंट (महारेल) यांच्याशी करार केला आहे.  बेलासिस  पूल प्रकल्प पूर्णत्‍वाचा कालावधी एप्रिल २०२६ पर्यंत आहे; मात्र या पुलाचे बांधकाम नियोजित कालावधीपूर्वी पूर्ण करून डिसेंबर २०२५ अखेरपर्यंत पूल वाहतुकीस खुला करण्यासाठी प्रयत्नशील राहावे, असे निर्देश अतिरिक्‍त महापालिका आयुक्‍त (प्रकल्‍प) अभिजित बांगर यांनी दिले आहेत.

रेल्वे प्राधिकरणाकडून तुळयांचे मजबुतीकरण, पुलाच्‍या प्रवास पृष्‍ठभागाची रचना, स्लॅब कास्टिंग इत्यादी कामे केली जात आहेत. यासाठी वाहतूक व वीजपुरवठा या दोन्‍ही घटकांचे ४० खंड घेतले जाणार आहेत. पालिका आयुक्त भूषण गगराणी यांच्या मार्गदर्शनाखाली पालिकेच्या पूल खात्यामार्फत हे काम केले जात आहे. नागरिकांचा प्रवास विनाअडथळा व्‍हावा, या उद्देशाने ब्रिटिशकालीन १३० वर्षे जुना बेलासि‍स पूल पाडून त्‍याची पुनर्बांधणी केली जात असल्याचे पालिकेने स्पष्ट केले आहे.
---
तांत्रिक कामांना वेग      
पूल उभारणी करताना माती परीक्षण, पायाबांधणी, खांबांचे बांधकाम पूर्ण झाले आहे. बांधकामास अडथळा ठरणारी बांधकामे हटविण्यात आली आहेत.  पूर्व बाजूला पोहोच रस्‍त्‍यासाठी पालिकेच्‍या वतीने ४० तुळया बसवाव्या लागणार आहेत. त्‍यापैकी चार तुळया बसवण्‍यात आल्‍या आहेत. रेल्वे हद्दीतील काम पश्चिम रेल्वे करीत असून, रेल्वे कंत्राटदाराने  ३६ मीटर स्‍पॅनच्‍या एकूण १२ तुळया स्‍थापित करण्‍याची कार्यवाही पूर्ण केली आहे. तुळयांचे काम पूर्ण झाल्यानंतर दोन्‍ही पोहोच मार्गांची कामे हाती घेऊन ३१ डिसेंबरपर्यंत पुलाचे संपूर्ण काम पूर्ण होईल, असे बांगर यांनी सांगितले.
------------------