मुंबई-पुणे एक्स्प्रेसवेवर भीषण अपघात
इन्फ्लुएंसर अस्फिया खानचा मृत्यू
पनवेल, ता. ११ (वार्ताहर) : लखनौ येथील सोशल मीडिया इन्फ्लुएंसर अस्फिया खान (२२) हिचा रविवारी (ता. १०) पनवेेल येथे भीषण अपघातात मृत्यू झाला आहे. मध्यरात्री मुंबई-पुणे एक्स्प्रेस मार्गावर अस्फिया खान व तिचे सहकारी मुंबईहून लोणावळा येथे जात असताना हा अपघात झाला. या अपघातात कारचालकासह अस्फिया खानचे चार सहकारीदेखील गंभीर जखमी झाले असून, त्यांच्यावर मुंबईतील कूपर रुग्णालयात उपचार सुरू आहेत.
अपघातातील मृत तरुणी मूळची उत्तर प्रदेशातील लखनौ येथे राहण्यास होती. ती आपल्या सहकाऱ्यांसह मुंबई फिरण्यासाठी आली होती. मध्यरात्री १२ वाजण्याच्या सुमारास त्यांचे वाहन मुंबई पुणे एक्स्प्रेस मार्गावरील पळस्पे महामार्ग पोलिस चौकीजवळ असताना, वाहनचालक नूर आलम खान (३४) याचे नियंत्रण सुटले. त्यामुळे त्यांचे वाहन रस्त्यालगत असलेल्या सिमेंटच्या ब्लॉकवर धडकले. या अपघातात पाठीमागील सीटवर बसलेले मोहम्मद अरबाज मोहम्मद अहमद (२४), मोहम्मद आरीफ मोहम्मद आझम (२४) व रिजवान खान (२६) हे सर्वजण गंभीररीत्या जखमी झाले. पनवेल तालुका पोलिसांनी तातडीने घटनास्थळी धाव घेऊन सर्व जखमींना कामोठे येथील एमजीएम हॉस्पिटलमध्ये दाखल केले. तपासाअंती चालकाच्या बेपर्वा आणि वेगमर्यादा ओलांडून वाहन चालवल्यामुळे सदरचा अपघात झाल्याचे निदर्शनास आले आहे. त्यानुसार चालकाविरोधात गुन्हा दाखल करण्यात आल्याची माहिती सहाय्यक पोलिस निरीक्षक सुभाष डिगे यांनी दिली.