बदलापूर, ता. ११ (बातमीदार) : बदलापूर पश्चिमेकडील बाजारपेठेतील मुख्य रस्ता खचला आहे. रस्त्याच्या मध्यभागीच मोठा खड्डा पडला आहे. आतल्या लोखंडी सळया बाहेर आल्या असून, खड्डा चुकवताना एखादा मोठा गंभीर अपघात होण्याची भीती दुचाकी आणि रिक्षाचालकांनी व्यक्त केली आहे.
बदलापूर पश्चिमेला कल्याण-अंबरनाथकडून येणारा आणि बदलापूरमार्गे पुढे बारवी धरण-मुरबाडचा हा मुख्य महामार्ग आहे. रस्त्याच्या दुतर्फा मुख्य बाजारपेठ आहे. प्रचंड रहदारीचा रस्ता असून येथे मोठा खड्डा पडला आहे. रस्ता खचल्याने बांधकामाचे थर निघून लोखंडी सळ्या बाहेर आल्या आहेत. त्यामुळे हा खड्डा चालकांसाठी धोकादायक बनला आहे. याचा दुचाकी आणि रिक्षाचालकांना मोठा त्रास सहन हाेत आहे. चारचाकी, अवजड वाहने, बसचा या खड्ड्यात चाक अडकल्यास एका बाजूला कलंडत आहेत. रस्त्याच्या दुतर्फा अनधिकृत फेरीवाल्यांचा विळखा असताना रस्ता अरुंद पडत आहे. त्यामुळे खड्डा चुकवताना चालकांना मोठी कसरत करावी लागत आहे. त्यात थोडा जरी पाऊस पडला तर मुख्य रस्त्यावर साचत असलेल्या पाण्यामुळे खड्ड्याचा अंदाज येत नाही. अशा वेळी मोठा अपघात होण्याची शक्यता वर्तवली जात आहे. अनेक दिवसांपासून हा खड्डा मोठा होत आहे. पालिकेने याकडे लक्ष देऊन रस्ता दुरुस्त करावा, अशी चालक करत आहेत.

रिक्षा चालवून कुटुंबाचा उदरनिर्वाह करतो. रोज या रस्त्यांवरून प्रवासी भाडे घेऊन जाताना खड्ड्याचा मोठा त्रास होतो. चाक खड्ड्यात अडकले, तर रिक्षा कलंडून जाते. यामुळे प्रवासी घाबरतात. आम्हालाही तेवढाच त्रास होतो. पालिकेने लवकरात लवकर हा खड्डा भरून रस्त्याची दुरुस्ती करावी.
- अरुणा कदम, महिला रिक्षाचालक

दुचाकीवरून जाताना अनेकदा खड्ड्यांचा अंदाज येत नाही. त्यात पावसात या रस्त्यावर मोठ्या प्रमाणात पाणी साचलेले असते. तेव्हा तर खड्डाच दिसत नाही. हा खड्डा बुजवला नाही तर नक्कीच मोठा अपघात होण्याची शक्यता नाकारता येत नाही.
- प्रणव पांगरीकर, दुचाकीचालक

वाहनचालकांना होत असलेली अडचण पाहता, सायंकाळी किंवा उद्या पाऊस कमी असताना खड्डा बुजवून रस्ता सुस्थितीत करण्यात येईल.
- विजय पाटील, शहर अभियंता, बदलापूर पालिका