सरदार रघुजी भोसले यांची
तलवार सरकारच्या ताब्यात

मुंबईत साेमवारी आणणार

मुंबई, ता. ११ : नागपूरकरच्या भोसले घराण्याचे संस्थापक आणि छत्रपती शाहू महाराजांच्या काळातील मराठा सैन्यातील एक महत्त्वाचे सरदार रघुजी भोसले यांची महाराष्ट्र सरकारने लिलावात जिंकलेली तलवार आज लंडन येथे जाऊन सांस्कृतिक कार्य मंत्री ॲड. आशीष शेलार यांनी ताब्यात घेतली. सोमवारी (ता. १८) ही तलवार मुंबईत दाखल होणार आहे.

राज्य सरकारतर्फे सांस्कृतिक कार्य मंत्री ॲड. आशीष शेलार यांनी लंडन येथे प्रत्यक्ष भेटून त्याच्या कायदेशीर बाबी पूर्ण करून ही तलवार ताब्यात घेतली. अशा प्रकारे परदेशात गेलेली ऐतिहासिक वस्तू लिलावात जिंकण्याची ही पहिलीच वेळ आहे. अनेक पराक्रमांची साक्षीदार असलेली ही ऐतिहासिक तलवार आपल्या ताब्यात घेण्याचे भाग्य मला लाभले. तमाम महाराष्ट्राचा हा एक ऐत‍िहासिक विजय असल्याचे शेलार यांनी सांगितले. ही तलवार ताब्यात घेताना लंडन येथील मराठी नागरिक मोठ्या संख्येने उपस्थित होते. या दौऱ्यात महाराष्ट्र शासनाच्या पुरातत्त्व विभागाचे उपसंचालक हेमंत दळवी सहभागी झाले.
सर्व कायदेशीर बाबी पूर्ण करून ही तलवार सोमवारी सकाळी १० वाजता छत्रपती शिवाजी महाराज आंतरराष्ट्रीय मुंबई विमानतळावर दाखल होईल. स्वतः सांस्कृतिक कार्य मंत्री ॲड. आशीष शेलार यांच्या उपस्थितीत बाइक रॅली काढून वाजतगाजत ही तलवार दादरच्या पु. ल. देशपांडे कला अकदमीमध्ये आणण्यात येणार आहे. याच दिवशी मान्यवरांच्या उपस्थितीत ‘गड गर्जना’ हा कार्यक्रम होणार असल्याची माहिती मंत्री शेलार यांनी दिली.
--
लिलावात शासनाचा सहभाग
ऐतिहासिक दस्तऐवज असलेली ही तलवार लिलावात निघाल्याचे वृत्त २८ एप्रिल २०२५ रोजी समोर आले होते. त्या पार्श्वभूमीवर मंत्री शेलार यांनी मुख्यमंत्री देवेंद्र फडणवीस यांच्याशी चर्चा करून तलवार शासनाला मिळावी या दृष्टीने नियोजन सुरू केले. यासाठी नियोजन व संपर्क यंत्रणा उभी केली. मुख्यमंत्र्यांनी केलेल्या सूचनेप्रमाणे ॲड. शेलार यांनी तातडीने एक मध्यस्थ उभा करून या लिलावात शासनाने सहभाग घेतला व लिलाव जिंकला.