म्हाडा काेकण मंडळाची
अर्ज भरण्यास मुदतवाढ
सकाळ वृत्तसेवा
मुंबई, ता. ११ : म्हाडाच्या कोकण मंडळाने ठाणे, नवी मुंबई, कल्याण, डोंबिवली येथील ५,२५७ घरांच्या विक्रीसाठी लाॅटरी काढली आहे. त्यासाठी इच्छा असूनही अद्याप ऑनालाइन अर्ज करू न शकलेल्यांना खुशखबर आहे. म्हाडाने या घरांसाठी अर्ज करण्याची अंतिम मुदत १३ ऑगस्टवरून २८ ऑगस्टपर्यंत वाढवली आहे. त्यामुळे अनेकांना मोठा दिलासा मिळू शकणार आहे.

आतापर्यंत ६७,५३९ जणांनी ऑनलाइन अर्ज भरले आहेत, तर ४० हजार ९९८ जणांनी अनामत रकमेचा भरणा करत आपला अर्ज अंतिम केला आहे. कागदपत्रांअभावी काही जणांना अद्याप अर्ज भरता आलेला नाही. तसेच काही योजनांतील घरांना कमी प्रतिसाद येत असल्याने म्हाडाने अंतिम अर्ज करण्याची मुदत १५ दिवसांनी वाढवून २८ ऑगस्ट केली आहे, तर १८ सप्टेंबरला लाॅटरी काढली जाऊ शकते, अशी माहिती म्हाडाच्या एका वरिष्ठ अधिकाऱ्याने दिली.