दादरचा कबुतरखाना पुन्हा बंदिस्त
ताडपत्री काढल्यास कारवाईचा पालिकेचा इशारा

सकाळ वृत्तसेवा
मुंबई, ता. ११ : दादर येथील कबुतरखाना रविवारी रात्री पुन्हा ताडपत्री बांधून पालिकेने बंदिस्त केला आहे. ताडपत्री काढल्यास कडक कारवाई करण्याचा इशारा पालिकेने दिला आहे. पर्यावरणप्रेमी आणि जैन धर्मीयांच्या आंदोलनानंतर या ठिकाणी कोणताही अनुचित प्रकार घडू नये, यासाठी पोलिसांचा कडक बंदोबस्त कबुतरखान्याच्या परिसरात ठेवण्यात आला आहे.

गेल्या ६ ऑगस्टला कबुतरखान्याच्या परिसरात कबूतरखाना चालू ठेवावा आणि कबुतरांना दाणापाणी देण्याची मुभा मिळावी, या मागणीसाठी कबुतरप्रेमी आणि जैन धर्मीयांनी आंदोलन केले होते. कबुतरखाना पालिकेने ताडपत्री लावून बंद केला होता. आक्रमक झालेल्या आंदोलकांनी ही ताडपत्री फाडून बाजूला केली. कबुतरखाना बंद करण्याच्या पालिकेच्या निर्णयाचा आंदोलकांनी निषेध केला. तेव्हापासून येथे पोलिस बंदोबस्त ठेवण्यात आला आहे.

पालिकेने आपल्या भूमिकेवर ठाम राहून काल रविवारी रात्री कबुतरखाना पुन्हा पालिकेने ताडपत्रीने बंदिस्त केला आहे. न्यायालयाच्या आदेशाचे पालन करीत आहोत, असे पालिकेने स्पष्ट केले होते. जैन समाजातील नागरिक आक्रमक झाल्याने या परिसरात पोलिस सतर्क झाले आहेत. ताडपत्री पुन्हा काढल्यास कडक कारवाई करण्याचा इशारा पालिकेने दिला आहे.
--------------------------
पुढील सुनावणी १३ ऑगस्ट रोजी
दादर येथील कबुतरखान्याचा विषय संवेदनशील झाल्याने तो उच्च न्यायालयात गेला आहे. पुढील सुनावणी येत्या १३ ऑगस्टला असून, या दिवशी न्यायालय काय निर्णय देणार, याकडे सर्वांचे लक्ष लागले आहे.
------------
समर्थक-विराेधक आमनेसामने
दादरसह इतर कबुतरखान्यांवर कारवाईचा आदेश न्यायालयाने कायम ठेवला आहे. त्यामुळे पालिकेने कबुतरखान्यावर कारवाई सुरू ठेवली आहे. या कारवाईला जैन मुनींसह जैन समुदायाने विरोध केला आहे. कबुतरखान्यावरील बंदी उठवली नाही तर १३ ऑगस्टला आंदोलन करण्याचा निर्णय जैन समाजाने घेतला आहे. दुसरीकडे कारवाईच्या समर्थनार्थ मराठी एकीकरण समिती १३ ऑगस्टला आंदोलन करणार आहे.