हृदयविकाराच्या झटक्याने पोलिस अधिकाऱ्याचा मृत्यू
शासकीय इतमामात अंत्यसंस्कार

बदलापूर, ता. ११ (बातमीदार) ः बदलापूर पश्चिम पोलिस ठाण्याचे सहाय्यक पोलिस उपनिरीक्षक म्हणून सेवा देणाऱ्या विजय रोकडे यांचे कर्तव्य बजावत असताना काल (ता. १०) दुपारी हृदयविकाराच्या झटक्याने निधन झाले. त्यांच्यावर आज सकाळी बदलापूर इथल्या स्मशानभूमीत शासकीय इतमामात अंत्यसंस्कार करण्यात आले. त्यांच्या पश्चात पत्नी, दोन मुले, सुना, मुलगी, जावई व नातवंडे असा परिवार आहे.
काही दिवसांपूर्वी त्यांच्या बदलीचे पत्र आले होते; मात्र पुढील वर्षी सेवानिवृत्ती आहे तर उर्वरित सेवेचा काळ हा बदलापुरात राहूनच पूर्ण करण्याची इच्छा असल्याचे त्यांनी पोलिस आयुक्तालयात कळवल्यानंतर पोलिस आयुक्तांनी ही मागणी मान्य केली. त्याच आनंदात सेवा बजावताना विजय रोकडे यांनी काल सकाळी त्यांच्या छातीत हलके दुखत असल्याचे इतर सहकाऱ्यांना सांगितले. या वेळी घरी जाऊन येतो, असे म्हणून ते घरी जाऊन काही वेळानंतर पुन्हा कामावर आले. त्यांना छातीतले दुखणे सतावत असल्याने या वेळी सहकाऱ्यांनी दवाखान्यात जाऊन तपासणी करून घेण्याचे सुचवले. मात्र रोकडे हे रुग्णालयात न जाता थेट घरी गेले. घरी गेल्यानंतर लगेच त्यांची शुद्ध हरपली. या वेळी कुटुंब आणि पोलिस प्रशासनाच्या मदतीने त्यांना खासगी रुग्णालयात नेले असता, तेथील डॉक्टरांनी विजय रोकडे यांना मृत घोषित केले. पश्चिमेकडील मोहनानंदनगर येथील वैकुंठधाम स्मशानभूमीत त्यांच्यावर शासकीय इतमामात अंत्यसंस्कार करण्यात आले.