घरमालकाला कोंडून दीड कोटीचे सोने चोरले

नालासोपारा, ता. ११ (बातमीदार) : घरमालकाला बाथरूममध्ये बंद करून वसईत एका चोरट्याने भरदिवसा दीड कोटी रुपयांच्या सोन्याच्या दागिन्यांसह रोख रकमेची चोरी करून फरार झाल्याची घटना वसई पश्चिम शास्त्रीनगर येथील किशोर कुंज इमारतीत घडली. उदय भानुशाली यांच्या घरात सोमवारी (ता. ११) दुपारी साडेबारा ते एकच्या दरम्यान ही घटना घडली असून, माणिकपूर पोलिसांनी तपास सुरू केला आहे.
घरातील महिला रक्षाबंधनासाठी गेल्या होत्या, तर मुले कामावर गेली होती. घरात एकटेच वयोवृद्ध उदय भानुशाली असताना दुपारी चोरट्याने डुप्लिकेट दाढी आणि तोंडाला मास्क लावून ओळखीचा असल्याचा दाखवून घरात प्रवेश केला. त्यानंतर बाथरूमला गेला आणि तुमच्या बाथरूम लिकेज आहे, असे सांगतिले. घरमालक पाहण्यासाठी गेले असता, त्यांना बाथरूममध्ये ढकलून बंद करून, घरातील सर्व सोने घेऊन चोरटा फरार झाला. घरमालकाने बाथरूमची खिडकी तोडून आरडाओरडा केला असता ही घटना उघड झाली आहे. याबाबत माणिकपूर पोलिसांनी घटनास्थळाचा पंचनामा करून तपास सुरू केला आहे. मात्र, भरदिवसा एका वृद्धाला बाथरूममध्ये कोंडून घरात चोरी झाल्याने वसईतील कायदा सुव्यस्थेवर प्रश्नचिन्ह निर्माण झाले आहे.