ड्रग्ज बनवण्याऱ्या टोळीचा पर्दापाश

कर्जत, ता. ११ (बातमीदार) ः कर्जत तालुक्यातील दुर्गम ताडवाडी परिसरात ग्रामस्थांच्या जागरूकतेमुळे अमली पदार्थ (ड्रग्ज) बनवणाऱ्या टोळीचा आज पर्दाफाश करण्यात आला.
गेल्या काही दिवसांपासून ताडवाडीतील माळावरील काही घरांमध्ये रात्री उशिरापर्यंत हालचाली वाढल्या होत्या. ग्रामस्थांना संशय आल्याने त्यांनी मध्यरात्री प्रत्यक्ष पाहणी केली असता, एका घराबाहेर बर्फाच्या लाद्यांचा मोठा साठा दिसला. घराच्या आत पाहिल्यावर रसायनयुक्त ड्रम, संशयास्पद साहित्य आणि काही अनोळखी व्यक्ती आढळल्या. परिसरात पसरलेल्या उग्र वासामुळे ग्रामस्थांनी चौकशी केली असता, संबंधितांनी अरेरावी करीत धावून येण्याचा प्रयत्न केला. मात्र, गावकऱ्यांनी धैर्य दाखवत पाच जणांना पकडून थेट पोलिसांच्या हवाली केले. माहिती मिळताच नेरळ पोलिस घटनास्थळी दाखल झाले. पाहणीदरम्यान अमली पदार्थ तयार करण्यासाठी लागणारे साहित्य, रसायनांचा साठा आणि एक चारचाकी वाहन जप्त करण्यात आले. प्राथमिक तपासानुसार, हे साहित्य एम.डी. ड्रग्स तयार करण्यासाठी वापरले जात असल्याचा अंदाज व्यक्त केला जात आहे.