विधिमंडळाच्या समितीपुढे मागासवर्गीयांबाबत नाराजी
नवी मुंबई पालिकेतील प्रकार; इंटक आक्रमक

सकाळ वृत्तसेवा
नवी मुंबई, ता. ११ : नवी मुंबई महापालिकेला भेट देण्यासाठी आलेल्या महाराष्ट्र विधिमंडळ अनुसूचित जाती कल्याण समितीसमोर मागासवर्गीय अधिकारी व कर्मचाऱ्यांवर होत असणाऱ्या अन्यायाबाबत कामगार संघटनांनी आक्रमक पवित्रा घेतला. महापालिका प्रशासनाकडून मागासवर्गीय अधिकारी आणि कर्मचाऱ्यांवर होत असलेल्या अन्यायाचा पाढा इंटकने समितीसमोर वाचला. समितीने अन्याय झालेल्या अधिकाऱ्यांना न्याय मिळवून द्यावा, अशी मागणी कामगार संघटनांनी केली.
महाराष्ट्र विधिमंडळ अनुसूचित जाती कल्याण समिती ही नवी मुंबई शहरात महापालिका, एमआयडीसी व अन्य आस्थापनांना भेटी देऊन तेथील कामगार संघटनांशी व अन्य वर्गाशी चर्चा करणार आहे. सोमवारी सकाळी नवी मुंबई महापालिका मुख्यालयात महाराष्ट्र विधिमंडळ अनुसूचित जाती कल्याण समितीने कामगार संघटनांशी चर्चा केली. नवी मुंबई इंटककडून महापालिका प्रशासनाकडून कशा प्रकारे अनुसूचित जाती संवर्गातील कर्मचारी व अधिकाऱ्यांवर होत असलेला अन्याय नवी मुंबईचे जिल्हाध्यक्ष रवींद्र सावंत यांनी निदर्शनास आणून दिला. महापालिकेचे अधिकारी विजय रांजणे हे लेखा अधिकारी असून ते लेखा संवर्गातील अधिकारी, उपमुख्य लेखा व वित्त अधिकारी तथा उपमुख्य लेखा परीक्षक या पदासाठी नियमित पदोन्नतीस पात्र आहेत; परंतु प्रशासन रांजणे यांना उपमुख्य लेखा वित्त अधिकारी तथा उपमुख्य लेखा परीक्षक या पदावर पदोन्नती देण्यास हेतुपुरस्सर टाळाटाळ करीत असल्याचा सावंत यांनी आरोप केला.
महापालिकेचे विधी अधिकारी अभय जाधव हे मुख्य विधी अधिकारी या पदासाठी एकमेव पात्र उमेदवार असताना त्यांची पदोन्नती आयुक्तांनी रखडून ठेवल्याचाही प्रकार समितीसमोर मांडण्यात आला. अग्निशमन विभागातील संदेश चन्ने यांच्यापेक्षा कनिष्ठ असलेल्या कर्मचाऱ्यास पदोन्नती देण्यात आलेली आहे, परंतु चन्ने यांना पदोन्नती नाकारण्यात आल्याची बाब चर्चेस आली. या बाबींची चौकशी व्हावी, अशी मागणी इंटकतर्फे करण्यात आली. याप्रसंगी भाजपच्या आमदार मंदा म्हात्रे उपस्थित होत्या.