मॅरेथॉन पूर्ण करणारे बेनी यांचे निधन

ठाणे, ता. ११ : ठाणे महापालिकेच्या वतीने रविवारी आयोजित केलेली वर्षा मॅरेथॉन स्पर्धेत २१ किलोमीटर अंतर स्पर्धेत पत्नीसोबत सहभागी होऊन ती यशस्वी पार केल्यानंतर घरी गेलेले बेनी देवासी (वय ४५) यांचे हृदयविकाराचा झटका आल्याने निधन झाले.
बेनी यांनी दोन महिन्यांपूर्वीच दक्षिण आफ्रिकेतील कॉम्रेड मॅरेथॉन ही अतिशय खडतर मॅरेथॉन पार केली होती. त्यानंतरची वर्षा मॅरेथॉन स्पर्धा ही बेनी यांची शेवटची मॅरेथॉन ठरली. ठाण्यातील वसंत विहार भागात राहणारे बेनी हे परदेशात नोकरीला होते. ते देशविदेशातील विविध आंतरराष्ट्रीय मॅरेथॉन स्पर्धांमध्ये सहभाग घेत. त्यामुळे त्यांच्यावर सर्वच धावपटूंकडून कौतुकाचा वर्षाव केला जात होता. ठाण्यातील मॅरेथॉन स्पर्धा पूर्ण करून घरी गेल्यावर बेनी यांना हृदयविकाराचा झटका आला. त्यांच्या निधनाने त्यांचे कुटुंबीय, नातेवाईक आणि मित्र-मंडळीकडून हळहळ व्यक्त केली जात आहे.