मुरबाडमध्ये अमली पदार्थविरोधी जनजागृती रॅली
मुरबाड, ता. १२ (वार्ताहर) : मुरबाड पोलिस स्टेशनतर्फे अमली पदार्थविरोधी जनजागृती अभियानांतर्गत मुरबाड शहरात भव्य रॅली काढण्यात आली. या अभियानाचा उद्देश युवकांमध्ये अमली पदार्थांच्या दुष्परिणामांविषयी जागरूकता निर्माण करणे आणि त्यापासून दूर राहण्यासाठी प्रेरणा देणे हा होता.
रॅलीत मुरबाड पोलिस ठाण्याचे पोलिस कर्मचारी, न्यू इंग्लिश स्कूलचे विद्यार्थी व स्थानिक नागरिकांनी सक्रिय सहभाग घेतला. शहरातील प्रमुख मार्गांवरून मार्गक्रमण करताना विद्यार्थ्यांनी ‘नशामुक्त समाज, समृद्ध भविष्य’ आणि ‘आमली पदार्थांना ‘नाही’, शिक्षण आणि प्रगतीला ‘हो,’ अशा घोषणांनी वातावरण उत्साहपूर्ण केले.
रॅलीदरम्यान नागरिकांना अमली पदार्थांमुळे होणारे शारीरिक, मानसिक आणि सामाजिक नुकसान याविषयी मार्गदर्शन करण्यात आले. पोलिस निरीक्षक संदीप गीते यांनी अमली पदार्थांविरोधातील लढ्यात केवळ पोलिसांचे प्रयत्न पुरेसे नसून, समाजातील प्रत्येकाने पुढाकार घेणे आवश्यक आहे असे सांगितले. आमदार किसन कथोरे यांनी शाळा-महाविद्यालयांत नियमित जनजागृती कार्यक्रमांची गरज अधोरेखित केली. या उपक्रमाच्या यशस्वी आयोजनासाठी पोलिस कर्मचारी, शिक्षक, विद्यार्थी व नागरिकांचे सहकार्य मोलाचे ठरले. मुरबाड पोलिस ठाण्याने भविष्यातही असे उपक्रम राबवण्याचा निर्धार व्यक्त केला. रॅलीस मुरबाडचे आमदार किसन कथोरे, उपविभागीय पोलिस अधिकारी अनिल लाड, पोलिस निरीक्षक संदीप गीते, न्यू इंग्लिश स्कूलचे प्राचार्य राकेश पाडवी, सानावणे सर, अन्य शिक्षक व स्थानिक सामाजिक कार्यकर्ते उपस्थित होते.