विरार, ता. १२ (बातमीदार) : स्वातंत्र्यादिनाच्या पूर्वसंध्येपासून मांसविक्री बंदचे आवाहन करणाऱ्या कल्याण-डोंबिवली महापालिकेचा वसई-विरारमधील खाटीक संघटनेने निषेध केला आहे. याबाबतचे पत्र तहसीलदार कार्यालयाला दिले आहे. कल्याण-डोंबिवली महापालिकेच्या प्रशासकीय अधिकाऱ्यांनी १४ ऑगस्टच्या रात्रीपासून मटणविक्री बंदचे आदेश काढले. खाटीक समाज, तसेच इतर जनतेच्या संविधानिक अधिकारांवर आणि खाद्यसंस्कृतीवर महाराष्ट्र सरकारकडून सतत प्रहार होत आहे. खाटीक समाजावर होणारा अन्याय सहन केला जाणार नाही. तसेच कोणत्याही दिवशी खाटीक समाज आपला व्यवसाय बंद करणार नाही. वेळप्रसंगी समाज रस्त्यावर उतरून निदर्शने करण्यास सिद्ध झाला आहे. पालिकेने आदेश तत्काळ मागे घ्यावेत, असे खाटीक समाजाने सोमवारी (ता. ११) तहसील कार्यालयात दिलेल्या पत्रात म्हटले आहे. याप्रसंगी कॅप्टन नीलेश पेंढारी, जितेंद्र कोथमिरे, सुनील जाधव, हेमंत लाड, जावेद शेख, मोहसीन सव्वालाखे, रियाज कुरेशी, इस्माईल शेख आदी उपस्थित होते.