...अन्यथा खड्ड्यांच्या छायाचित्रांचे प्रदर्शन भरवू
गणरायाच्या आगमनापूर्वीच रस्त्यांवरील खड्डे तातडीने बुजवाः मनसे आक्रमक
तुर्भे, ता. १२ (बातमीदार) : सानपाडा विभागात रस्त्यांवरील खड्ड्यांच्या मुद्द्यावरून महाराष्ट्र नवनिर्माण सेना आक्रमक झाली आहे. रस्त्यांवरील खड्डे तातडीने बुजविण्याची मागणी मनसेने पालिका आयुक्तांकडे केली आहे. गणरायाच्या आगमनापूर्वी रस्त्यांवरील खड्डे तत्काळ बुजवा अन्यथा खड्ड्यांच्या छायाचित्रांचे प्रदर्शन भरवून मनसे स्टाइल आंदोलन करण्याचा इशारा दिला आहे.
गणरायाच्या आगमनाला केवळ काहीच दिवस शिल्लक राहिले आहेत. अशात सानपाडा विभागातील रस्त्यांवरील खड्ड्यांचे विघ्न अद्याप दूर झालेले नाही. नवी मुंबई पालिकेने शहरातील रस्ते, गटारे, पदपथ, मलनिस्सारण वाहिन्या आणि कल्व्हर्टची कामे १५ मेपर्यंत पूर्ण करण्याचे निर्देश दिले होते, मात्र हे आदेश कागदावरच राहिल्याचे दिसत असून, या ढिम्म कारभारावर मनसेकडून टीका करण्यात आली आहे.
सानपाडा गाव, सिडको वसाहत, पोलिस ठाणेसमोरील चौक, सानपाडा रेल्वेस्थानकाचा परिसर, पाम बीच विभागांत मोठ्या प्रमाणात खड्डे पडले आहेत. त्यामुळे गणरायाच्या आगमन-विसर्जन मिरवणुकांचा प्रवास खड्ड्यांतून होणार असल्याचे दिसते आहे. त्यामुळे तातडीने सानपाडा विभागातील खड्डे बुजवावे, यासंदर्भातील आदेश आयुक्तांनी संबंधित विभागाला द्यावेत, अशी मागणी मनसेने पत्राद्वारे केली आहे अन्यथा मनसे स्टाइलने गणपती मंडळे, सामाजिक संस्था आणि विभागातील नागरिकांना सोबत घेऊन खड्ड्यांच्या छायाचित्रांचे प्रदर्शन भरवू आणि तीव्र आंदोलन केले जाईल, असा इशारा मनसेचे उपशहर अध्यक्ष योगेश शेटे यांनी आयुक्तांना दिला आहे.