भुखंड बंदीला नागरिकांचा विरोध
नेरुळमध्ये नशेच्या आहारी गेलेल्या व्यक्तींचा उपद्रव
नेरूळ, ता. १२ (बातमीदार) ः नवी मुंबईतील नेरूळ सेक्टर सहामध्ये नशेच्या आहारी गेलेल्या व्यक्तींचा उपद्रव वाढला आहे. यामुळे स्थानिक नागरिक त्रस्त झाले असून या पार्श्वभूमीवर सिडकोकडून भुखंड बंदीस्त करण्याच्या हालचालींना नागरिकांनी तीव्र विरोध केला आहे.
राजमाता जिजाऊ उद्यान, सागरदीप सोसायटी, दत्तगुरु टॉवर परिसर आणि महावितरण उपकेंद्र या परिसरात नशेच्या आहारी गेलेल्या व्यक्ती खुलेआम वावरताना दिसतात. या व्यक्तींकडून लहान मुलांचे अपहरण, मोबाईल चोरी, रिक्षाचालकांवर हल्ले अशा गंभीर घटना घडल्या आहेत. काही महिन्यांपूर्वीच सागरदीप सोसायटीतील लोखंडी जाळ्या नशेडींनी चोरून विकल्याचेही निदर्शनास आले. या पार्श्वभूमीवर वरुणा व हिमालय सोसायटीमध्ये असलेला मोकळा भुखंड बंदीस्त करण्यासाठी मंगळवारी (ता. १२) मजुरांकडून खोदकाम सुरू करण्यात आले. मात्र, स्थानिकांनी विरोध करत हा भुखंड पालिकेकडे हस्तांतरित करण्यासाठी मागणी केली आहे. नागरिकांनी सांगितले की, या जागेचा आधी मार्केटसाठी आरक्षण होता, परंतु ते अचानक गायब झाले.
खोदकाम ठिकाणी राष्ट्रवादी शरद पवार गटाचे नवी मुंबई जिल्हा उपाध्यक्ष, शिवसेना उबाठा गटाचे पदाधिकारी प्रल्हाद पाटील यांच्यासह काही राजकीय घटकांनी ठेकेदाराशी चर्चा केली. पत्रे लावल्यास जागा नशेच्या आहारी गेलेल्या व्यक्तींचा उपद्रव आणखी वाढण्यचा दावा नागरिकांनी केला. ही जागा बंद केल्यास दुर्घटना घडल्यास त्यास ठेकेदार आणि सिडको जबाबदार असेल, असा इशाराही देण्यात आला आहे.