१० कोटींचा जीएसटी घोटाळा
बनावट बिलिंग प्रकरणी सीजीएसटीकडून परफेक्ट ट्रेडिंग कंपनीच्या मालकांना अटक
नवी मुंबई, ता. १२ (वार्ताहर) : बनावट बिलांच्या आधारे इनपुट टॅक्स क्रेडिट मिळवणाऱ्या परफेक्ट ट्रेडिंग कंपनीवर केंद्रीय वस्तू आणि सेवा कर विभागाच्या बेलापूर येथील पथकाने छापा टाकत तब्बल १०.८३ कोटींचा घोटाळा उघडकीस आणला आहे. या कारवाईत सीजीएसटीच्या अधिकाऱ्यांनी कंपनीचे मालक प्रशांत अरुण भोईर व संतोष वसंत कदम या दोघांना अटक केली आहे.
परफेक्ट ट्रेडिंग कंपनीने प्रत्यक्ष कोणताही माल अथवा सेवा पुरवठा न करता मे. वन क्लीक शॉप प्रा.लि. या कंपनीला ६०.१८ कोटींच्या बनावट बिलांच्या आधारे १०.८३ कोटींचा बोगस आयटीसी दिला होता. त्यामुळे सीजीएसटीच्या पथकाने परफेक्ट ट्रेडिंग कंपनीच्या कार्यालयावर छापा टाकला. या तपासणीत कंपनीने मार्च महिन्याचा जीएसटीआर-१ दाखल केला असला तरी जीएसटीआर-३बी दाखल केला नव्हता. आणि जीएसटीआर- ए मध्ये कोणताही आवक पुरवठा नोंदवला नव्हता.
यावरुन कंपनीने कोणत्याही वस्तूंचा प्रत्यक्ष व्यवहार केला नसल्याचे आढळून आले. अधिक तपासात कंपनीने ६०.१८ कोटी रुपयांच्या खोट्या व बनावट बिलांचा वापर करुन १०.८३ कोटी रुपयांचे इनपुट टॅक्स क्रेडिट मिळविल्याचे आढळून आले. अधिक चौकशीत जीएसटी पोर्टल लॉगिनच्या तपशीलद्वारे संतोष कदम यांनी बनावट बिले तयार केली व बोगस आयटीसी पास केल्याची कबुली प्रशांत भोईर यांनी दिली. संतोष कदम यांनीही या व्यवहारातून स्वत: देखील आर्थिक लाभ घेतल्याची कबुली दिली आहे.
त्यानुसार जीएसटी कायद्याअंतर्गत गुन्हा दाखल करुन प्रशांत भोईर यांना गुरुवारी (ता. ७) तर आणि संतोष कदम यांना शुक्रवारी (ता. ८) अटक केली. या दोघांनाही बेलापूर येथील प्रथमवर्ग न्यायालयात हजर केले असता, न्यायालयाने त्यांना २० ऑगस्टपर्यंत न्यायालयीन कोठडी ठोठावल्याची माहिती अधिकऱ्यांनी दिली आहे.