चिंचघर उपसरपंचपदी कैलास ठाकरे यांची निवड
वाडा, ता. १२ (बातमीदार) : तालुक्यातील प्रतिष्ठित समजल्या जाणाऱ्या चिंचघर ग्रामपंचायतीच्या उपसरपंच पदाच्या निवडणुकीत मोठा उलटफेर झाला आहे. शिवसेना (एकनाथ शिंदे गट) सत्ताधाऱ्यांना धक्का देत भाजपचे कैलास ठाकरे विजयी झाले असून, त्यांच्या निवडीचा कार्यकर्त्यांनी जल्लोषात उत्सव साजरा केला.
चिंचघर ग्रामपंचायतीत एकूण १० सदस्य असून सरपंच लोकनियुक्त आहेत. यापैकी शिवसेना (एकनाथ शिंदे गट) व भाजप यांचे पाच-पाच सदस्य होते. काही दिवसांपूर्वी तत्कालीन उपसरपंच मनेश पाटील यांनी राजीनामा दिला होता. तसेच पॅनेलमधील एका सदस्याचे पद जिल्हाधिकाऱ्यांनी रद्द केल्याने सत्ताधाऱ्यांची संख्या चार इतकी झाली. आज झालेल्या निवडणुकीत कैलास ठाकरे यांना पाच मते तर सत्ताधारी पॅनेलचे गिरीश पाटील यांना चार मते मिळाली. परिणामी ठाकरे यांच्या गळ्यात उपसरपंच पदाची माळ पडली. निकाल लागताच भाजप कार्यकर्त्यांनी फटाके फोडून व घोषणाबाजी करीत जल्लोष साजरा केला. ही निवडणूक पीठासीन अधिकारी तथा ग्रामपंचायत अधिकारी पी. डी. सासे यांच्या उपस्थितीत पार पडली. या निकालाची चर्चा सध्या संपूर्ण तालुक्यात रंगली आहे.