बेस्टची दरवाढ लोकलच्या पथ्यावर
दैनंदिन प्रवासीसंख्येत तब्बल दोन लाखांची भर
सकाळ वृत्तसेवा
मुंबई, ता. १२ : बेस्ट बसच्या तिकीट दरवाढीमुळे मुंबईतील उपनगरीय रेल्वेच्या प्रवासीसंख्येत वाढ झाल्याचे स्पष्टपणे दिसत आहे. मध्य रेल्वेच्या दैनंदिन प्रवासीसंख्येत तब्बल दोन लाखांची वाढ झाली असून, दररोज सरासरी ४० लाख प्रवासीसंख्या आता ४२ लाखांवर पोहोचली आहे.
अलीकडेच बेस्टने तिकीट दरवाढ केली. विनावातानुकूलित बससाठी किमान भाडे पाचवरून १० रुपये, तर वातानुकूलित बसचे किमान भाडे सहावरून १२ रुपये करण्यात आले. अल्प व मध्यम अंतरासाठी बस प्रवास महाग झाल्याने मोठ्या संख्येने प्रवाशांनी रेल्वेची वाट धरली आहे. विशेषतः मुंबई, ठाणे, पालघर आणि रायगड या जिल्ह्यांच्या उपनगरीय मार्गांवर सकाळ-संध्याकाळच्या गर्दीच्या तासांत प्रवाशांची प्रचंड वाढ झाली आहे. दादर, कुर्ला, घाटकोपर, ठाणे स्थानकांवर प्रवाशांचा ओघ अधिक आहे. मुंबईत छत्रपती शिवाजी महाराज टर्मिनस (सीएसएमटी) हे सर्वाधिक गर्दीचे स्थानक ठरत असून, येथून दररोज सुमारे ११ लाख प्रवासी प्रवास करतात. त्यानंतर कुर्ला सहा लाख, ठाणे स्थानकावर सुमारे पाच लाख आणि कल्याण स्थानकावर चार लाख प्रवाशांची नोंद झाली आहे.
----
प्रवासी सुविधा वाढवण्यावर भर
रेल्वे प्रशासनाच्या माहितीनुसार, तिकीट आणि पासविक्रीत झालेली वाढ ही प्रवासीसंख्येतील बदलाचे द्योतक आहे. अधिक प्रवाशांची सोय व्हावी, यासाठी गाड्यांमध्ये अतिरिक्त डबे लावणे, काही सेवांच्या फेऱ्या वाढविणे तसेच तिकीट खिडक्या वाढविण्याचा विचार सुरू आहे. गर्दी नियंत्रणासाठी प्लॅटफॉर्मवरील वाहतूक व्यवस्थापन सुधारण्याची योजनाही आखण्याचे विचार सुरू असल्याची माहिती मध्य रेल्वेच्या वरिष्ठ अधिकाऱ्यांनी दिली.