नेरळजवळ ड्रग्ज कारखाना उघड, पोलिसांच्या कार्यक्षमतेवर प्रश्नचिन्ह
कर्जत, ता. १२ (बातमीदार) : कर्जत तालुक्यातील नेरळ पोलिस ठाण्याच्या हद्दीतील ताडवाडी, पाथरज येथे ग्रामस्थांच्या सतर्कतेमुळे मेफेड्रॉन (एमडी) ड्रग्ज तयार करणारा एक कारखाना उघडकीस आला आहे. या घटनेमुळे नेरळ पोलिसांच्या कार्यक्षमतेवर प्रश्नचिन्ह निर्माण झाले आहे. कारण त्यांच्या हद्दीत एवढ्या मोठ्या प्रमाणावर चालणाऱ्या या अवैध धंद्याची पोलिसांना माहिती कशी नव्हती, असा सवाल उपस्थित होत आहे.
ताडवाडी येथील गावकऱ्यांना १० ऑगस्ट रोजी एका घरात संशयास्पद हालचाली दिसल्या. त्यांनी रात्री उशिरापर्यंत या हालचालींवर लक्ष ठेवले आणि नंतर थेट पाच संशयितांना पकडून पोलिसांच्या स्वाधीन केले. पोलिसांनी घटनास्थळी तपासणी केली असता, त्यांना मेफेड्रॉन तयार करण्यासाठी लागणारे साहित्य आणि १६ लाख ४६ हजार रुपयांचा मुद्देमाल सापडला. याप्रकरणी नेरळ पोलिसांनी एनडीपीएस कायद्यांतर्गत गुन्हा दाखल केला असून, पाच आरोपींना अटक केली आहे. या आरोपींपैकी चार मुंबईचे आणि एक शहापूरचा आहे. आरोपींना घर भाड्याने देणाऱ्या मालकाचाही शोध सुरू आहे.
उपविभागीय पोलिस अधिकारी राहुल गायकवाड यांनी नागरिकांना आवाहन केले आहे, की घर किंवा फार्महाउस भाड्याने देताना भाडेकरूंची पूर्ण माहिती घ्यावी आणि संशयास्पद हालचाली दिसल्यास तातडीने पोलिसांना कळवावे. गावातील नागरिकांच्या या धाडसी कामगिरीमुळेच हा कारखाना उघडकीस आला आहे. यामुळे त्यांची सर्वत्र प्रशंसा होत आहे.