श्वानदंशामुळे पनवेलमध्ये घबराट
सात महिन्यांत चार हजार ६५१ जण गंभीर जखमी
पनवेल, ता. १४ (बातमीदार) ः भटक्या श्वानांनी गेल्या आठ महिन्यांत साडेचार हजारांपेक्षा अधिक नागरिक, लहान मुले, महिला, तसेच वृद्धांचे लचके तोडले आहेत. पनवेल महापालिका क्षेत्रात भटक्या श्वानांची दहशत वाढत चालली आहे. दिल्लीमध्ये भटके श्वान पकडून ते तत्काळ कोंडवाड्यात ठेवण्याचे आदेश सर्वोच्च न्यायालयाने नुकतेच दिले आहेत. त्या पार्श्वभूमीवर पनवेलच्या भटक्या श्वानांचा बंदोबस्त कधी करणार, असा संतप्त सवाल नागरिकरांनी उपस्थित केला आहे.
जानेवारीपासून पनवेल महापालिका क्षेत्रातील भटक्या श्वानांच्या निर्बीजीकरणावर १२ लाख ५२ हजार ३५० रुपये खर्च करण्यात आला आहे. आजतागायत पनवेल पालिका क्षेत्रात १९ हजार ३०७ एवढी श्वानांची संख्या असून १२ हजार ४८६ जणांचे निर्बीजीकरण झाले असल्याची माहिती इन डिफेन्स ऑफ ॲनिमल या संस्थेने दिली आहे. पालिका क्षेत्रामध्ये जानेवारीपासून ऑगस्ट महिन्यापर्यंत चार हजार ६५१ नागरिकांना श्वानांनी चावा घेतला आहे. तर चावा घेतलेल्या नागरिकांचे रेबीजचे लसीकरण करून चार हजार २५० लशी पालिकेच्या प्राथमिक आरोग्य केंद्रात उपलब्ध आहेत, अशी माहिती पालिकेचे मुख्य वैद्यकीय अधिकारी डॉ. आनंद गोसावी यांनी दिली.
.................
चौकट
असे आहेत न्यायालयाचे आदेश
कोंडवाड्यात श्वानांचे निर्बीजीकरण व लसीकरण करावे.
श्वान कोंडवाड्याबाहेर जाणार नाहीत, याची काळजी घ्या.
कोंडवाड्यांची संख्या वाढवणे, सीसीटीव्ही कॅमेरे बसवणे.
पकडलेल्या व कोंडवाड्यात ठेवलेल्या श्वानांची नोंद ठेवणे.
..................
चौकट
पालिका क्षेत्रातील श्वानांची संख्या - १९,३०७
भटक्या श्वानांवरील निर्बीजीकरणाचा खर्च - १२,५२,३५०
निर्बीजीकरण केलेल्या श्वानांची संख्या - १२,४८६
जानेवारीपासून चावा घेतलेल्या नागरिकांची संख्या - ४,६५१
प्राथमिक आरोग्य केंद्रात रेबीज प्रतिबंधक लशींची संख्या - ४,२५०
................