पालिकेच्या वतीने ‘हर घर तिरंगा’ अभियान
सकाळ वृत्तसेवा
मुंबई, ता. १४ ः केंद्र शासनाच्या निर्देशानुसार स्वातंत्र्यदिनानिमित्त दरवर्षीप्रमाणे यंदाही २ ते १५ ऑगस्ट या कालावधीदरम्यान ‘हर घर तिरंगा’ अभियान राबविले जात आहे. त्यानिमित्त पालिकेने विविध उपक्रमांचे आयोजन करण्यात येत असून, त्यात नागरिकही उत्स्फूर्त सहभागी होत आहेत.
पालिकेच्या सर्व विभागांमध्ये तिरंगा महोत्सव, तिरंगा मेळा, तिरंगा सांस्कृतिक कार्यक्रम, तिरंगा बाइक रॅली आणि सायकल रॅली, तिरंगा यात्रा, तिरंगा विक्री व वितरण, तिरंगा दौड आणि मॅरेथॉन, तिरंगा ट्रीब्यूट आदी उपक्रमांचे आयोजन करण्यात येत आहे. तसेच, शाळेच्या भिंती सजवणे, तिरंगा प्रदर्शन, तिरंगा रांगोळी स्पर्धा, तिरंगा राखी बनविण्याच्या स्पर्धा व कार्यशाळा, तिरंगा विणकाम व धागे सार्वजनिक प्रदर्शन, तिरंगा राष्ट्रध्वजाबाबत भावनेचा गौरव करण्यासाठी भारतीय जवान आणि पोलिस कर्मचाऱ्यांसाठी पत्रलेखन अभियान, तिरंगा प्रश्नमंजुषा, घरोघरी तिरंगा घरोघरी स्वच्छता, स्वातंत्र्याचा उत्सव स्वच्छतेसह आदी उपक्रमांचेही आयोजन करण्यात आले आहे.
मुंबईकरांनी आपल्या घरावर तिरंगा ध्वज फडकवावा. तसेच तिरंगा राष्ट्रध्वजासोबत सेल्फी, छायाचित्र किंवा व्हिडिओ काढून https://harghartiranga.com या संकेतस्थळावर अपलोड करावे. तसेच ‘घरोघरी तिरंगा’ अभियानात स्वयंसेवक म्हणून नोंदणी करावी, असे आवाहन पालिका प्रशासनाकडून करण्यात येत आहे.