साइडपट्टी दुरुस्ती स्वखर्चाने
रोहा, ता. १४ (बातमीदार) ः रोहा-तांबडी मार्गावरील साइडपट्टी खचल्याने रोजच अपघात होत आहेत. हे अपघात रोखण्यासाठी शहरातील माजी नगरसेवक अजित मोरे यांनी स्वखर्चाने तांबडी मार्गावरील साइडपट्टी दुरुस्तीचे काम केले. याबद्दल प्रवासी आणि नागरिकांनी अजित मोरे यांचे कौतुक होत आहे.
रोहा-तांबडी मार्गावरील हनुमान टेकडी रस्त्यावर नागमोडी वळणे आहेत. या धोकादायक वळणावरून वाहन चालविणे जिकिरीचे झाले आहे. अशातच पावसाळ्यात रस्त्याच्या दोन्ही बाजूने पावसाचे पाणी वाहत असल्याने मातीची धूप होते. परिणामी, साइडपट्टी खचल्याने वाहने रस्त्यावरून उतरून पलटी होत आहेत. काही ठिकाणी साईडपट्टीच नसल्यामुळे दुचाकी घसरून अपघात होत आहेत. या अपघातामुळे अनेक जण जखमी झाले आहेत. हे अपघात रोखण्यासाठी येथील सामाजिक कार्यकर्ते माजी नगरसेवक अजित मोरे व त्यांच्या मित्रमंडळींनी सामाजिक बांधिलकी राखत स्वखर्चाने साइडपट्टी भरल्याने नागरिकांतून समाधान व्यक्त होत आहे.

फोटो कॅप्शन :
रोहा ः रस्त्यावर खचलेली साइडपट्टी अजित मोरे यांनी स्वतः खर्च करून भरून घेतली.