उल्हासनगर, ता. १४ (वार्ताहर) : शहरातील महात्मा फुलेनगर परिसरातील एका घरात सुरू असलेल्या बेकायदा हुक्का पार्लरवर हिललाईन पोलिसांनी कारवाई करून आठ जणांविरुद्ध गुन्हा दाखल केला आहे. या छाप्यात दोन भाऊ हुक्का पार्लर चालवत असल्याचे उघड झाले आहे सहा ग्राहकांना रंगेहाथ पकडण्यात आले.
पवन माने व त्याचा भाऊ विशाल माने हे राहत्या घरात हुक्का पार्लर चालवत होते. १२ ऑगस्टला रात्री पोलिसांनी खडी मशीनजवळील घरावर छापा टाकला असता, सहा युवक हुक्का ओढताना आढळले. हुक्का पॉटसाठी २५० रुपये शुल्क घेत असल्याचे पोलिसांच्या तपासात स्पष्ट झाले. याप्रकरणी पवन माने, विशाल माने, मयूर खत्री, नितीन शमदशनी, कुणाल दौडेजा, ओम लुंड, बंटी अगिचा व तुषार खटवानी यांच्यावर गुन्हा दाखल करण्यात आला आहे. अशा अवैध प्रकारांवर सतत लक्ष ठेवून कठोर कारवाई केली जाणार असल्याचे पोलिसांनी स्पष्ट केले.