वसई, ता. १४ (बातमीदार) :
वसई-विरार शहरात स्वातंत्र्यदिनानिमित्त ध्वजारोहण तसेच विविध कार्यक्रमाचे आयोजन करण्यात आले. तिरंग्याचा जल्लोष साजरा करण्यासाठी नागरिक, प्रशासन सज्ज झाले आहेत. या वेळी वसई विरार महापालिकेने हर घर तिरंगा रॅलीचे आयोजन प्रभागात केले आहे.
स्वातंत्र्याचा अमृत महोत्सव अंतर्गत “घरोघरी तिरंगा” मोहीम वसई-विरार शहर महानगरपालिका क्षेत्रात राबविण्यात येत असून, महानगरपालिका मुख्यालय व प्रभाग समिती कार्यालयांमार्फत विविध कार्यक्रमांचे आयोजन करण्यात आले आहे. घरावर, इमारतीवर, आस्थापनेवर देशाचा तिरंगा ध्वज लावून राष्ट्रभक्तीने प्रेरित अभियानात सहभागी होण्याचे आवाहन पालिकेने केले आहे. नागरिकांना तिरंगा ध्वज, राष्ट्रीय स्वातंत्र्यदिनासंबंधीच्या आवश्यक वस्तू उपलब्ध होण्याच्या दृष्टीने महानगरपालीकेतर्फे बचत गटांच्यामार्फत विविध ठिकाणी बाजारपेठा सुरू करण्यात आल्या आहेत.
महानगरपालिकेमार्फत मुख्य रस्ते, चौक, उद्याने, मनपा कार्यालये येथे तिरंगा रोषणाई करण्यात येत असून, विविध ठिकाणी तिरंगा झेंडा लावण्यात येत आहे. तसेच नागरिकांना तिरंगा सोबत फोटो काढण्यासाठी विविध ठिकाणी सेल्फी पॉइंट उभारण्यात आले आहेत. तसेच महानगरपालिका क्षेत्रातील शाळा, महाविद्यालये यांमध्येही विविध देशभक्तीपर सांस्कृतिक कार्यक्रमांचे आयोजन करण्यात येणार आहे.