भाजपच्या संपर्कात असणाऱ्या शिंदेंच्या नगरसेवकांना तंबी
- ठाण्यात तातडीची बैठक

शर्मिला वाळुंज : सकाळ वृत्तसेवा
डोंबिवली, ता. १४ : महापालिका निवडणुकीच्या तोंडावर राजकीय खलबते सुरू झाली आहेत. शिवसेना शिंदे गटाची पक्षवाढीसाठी फोडाफोडी सुरू असताना आपल्या नगरसेवकांना मात्र इतर कोठेही न जाण्याची तंबी उपमुख्यमंत्री एकनाथ शिंदे यांनी बुधवारी (ता. १३) रात्री दिल्याची माहिती सूत्रांनी दिली. भाजप प्रदेशाध्यक्ष रवींद्र चव्हाण यांच्या संपर्कात असलेल्या कल्याण-डोंबिवलीमधील माजी नगरसेवकांना शिंदे यांच्या ठाण्यातील बंगल्यावर तातडीने बोलावण्यात आले होते. या बैठकीला आमदार राजेश मोरे यांच्यासह माजी नगरसेवक उपस्थित होते.
आगामी महापालिका निवडणुकांच्या पार्श्वभूमीवर राजकीय पक्षांनी पक्षबांधणीला सुरुवात केली आहे. मनसे, राष्ट्रवादी काँग्रेस शरदचंद्र पवार गट, शिवसेना ठाकरे गट या पक्षांतील बडे कार्यकर्ते, पदाधिकारी यांना गळाला लावून आपल्या पक्षात खेचण्याची सत्ताधारी पक्षांची जणू चढाओढच लागली आहे. ठाणे जिल्हा हा उपमुख्यमंत्री एकनाथ शिंदे यांचा बालेकिल्ला असून, जिल्ह्यातच आपल्या गटाची ताकद वाढवण्यासाठी त्यांनी कंबर कसली आहे. कल्याण-डोंबिवली हा भाजपचा बालेकिल्ला असून, येथे पहिल्यापासून संघाचे वर्चस्व राहिले आहे. डोंबिवलीचे आमदार रवींद्र चव्हाण हे आता भाजप प्रदेशाध्यक्ष झाल्यामुळे शिवसेना शिंदे गटाला टक्कर देण्यासाठी प्रदेशाध्यक्ष चव्हाण हेदेखील सरसावले आहेत. अलीकडेच त्यांनी कल्याण-डोंबिवलीला लागलेले ग्रहण सोडवण्यासाठी येथे भाजपचा महापौर बसवा, असे विधान केले होते. यामुळे आगामी पालिका निवडणुकीत भाजप व शिवसेना शिंदे गट वेगवेगळे लढण्याची अधिक शक्यता वर्तविली जात आहे. रवींद्र चव्हाण यांच्या संपर्कात कल्याण- डोंबिवलीमधील अनेक नगरसेवक असल्याची चर्चा आहे.
...
भेटीची चर्चा
कल्याण-डोंबिवली भाजपचे ४२ नगरसेवक असून, शिवसेनेचे ५२ नगरसेवक आहेत. यामध्ये शिवसेना शिंदे गटात सध्याच्या घडीला ४४ नगरसेवक आहेत. अनेकांनी रवींद्र चव्हाण यांची भेट घेतली असल्याची चर्चा आहे. म्हणूनच एकनाथ शिंदे यांनी रात्री तातडीने ही बैठक बोलावल्याची माहिती सूत्रांनी दिली.