स्वातंत्र्यदिनी प्लॅस्टिकमुक्त भारताचा संकल्प!
मुंबई, ता. १४ : स्वातंत्र्यदिनानिमित्त पर्यावरणाचे रक्षण करण्यासाठी ‘पंचमहाभूते फाउंडेशन’ने ‘१५ ऑगस्टपासून प्लॅस्टिकच्या बाटलीला ‘नाही’ म्हणू या’ ही विशेष मोहीम सुरू केली आहे. या मोहिमेद्वारे नागरिकांना प्लॅस्टिकच्या पाण्याच्या बाटल्यांचा वापर थांबवून पर्यावरणाची खरी ‘आझादी’ साजरी करण्याचे आवाहन करण्यात आले आहे.
फाउंडेशनच्या मते, एका प्लॅस्टिकच्या बाटलीला विघटित होण्यासाठी सुमारे ४५० वर्षे लागतात. यामुळे मोठ्या प्रमाणात प्रदूषण होते. तसेच प्लॅस्टिकच्या बाटलीतील पाण्यात असलेले सूक्ष्म प्लॅस्टिकचे कण मानवी आरोग्यासाठी अत्यंत हानिकारक असतात.
या मोहिमेत सहभागी होण्यासाठी नागरिकांना प्लॅस्टिकच्या बाटलीऐवजी स्टील, तांबे, माती किंवा काचेची बाटली वापरण्यास सांगितले आहे. १५ ऑगस्ट रोजी आपल्या नॉन-प्लॅस्टिक बाटलीसोबतचा फोटो सोशल मीडियावर #SayNoToPlasticWaterbottleCampaign आणि #AzadiFromPlastic या हॅशटॅगसह शेअर करून फाउंडेशनला टॅग करण्याचे आवाहन करण्यात आले आहे.
या मोहिमेला १५० पेक्षा जास्त सेलिब्रिटींनी पाठिंबा दिला आहे. प्लॅस्टिकला ‘नाही’ म्हणण्याचा हा निर्णय पर्यावरणाचे आणि आरोग्याचे रक्षण करण्यासोबतच देशातील सूक्ष्म, लघु व मध्यम उद्योगांनाही प्रोत्साहन देईल, असा विश्वास फाउंडेशनने व्यक्त केला आहे.