ठाण्यातील इमारतीला भीषण आग
३७५ जणांची सुखरूप सुटका; महिलेचा मृत्यू

सकाळ वृत्तसेवा
ठाणे, ता. १४ : स्वातंत्र्यदिनाच्या पूर्वसंध्येला ठाण्यातील कोलशेत एअर फोर्सजवळील कासा फ्रेस्को इमारतीच्या २२ व्या मजल्यावर गुरुवारी सायंकाळी भीषण आग लागली. या आगीनंतर इमारतीतील ३७५ लोकांची सुखरूप सुटका करण्यात अग्निशमन दलाच्या जवानांसह आपत्ती व्यवस्थापन कक्षेच्या कर्मचाऱ्यांना यश आले, मात्र धुराच्या त्रासाने २८व्या मजल्यावरील जयश्री ठाकरे (वय ३४) या महिलेचा मृत्यू झाला, तर २५व्या मजल्यावरील राजेंद्र तिवारी यांना ही धुरा त्रास झाला.
कोलशेत एअर फोर्सजवळ, लोढा अमारा, कासा फ्रेस्को बिल्डिंग विंग ८ ही तळ अधिक २८ मजली इमारत आहे. या इमारतीच्या २२ व्या मजल्यावरील फ्लॅट नंबर २२०३ हा वैशाली कळव यांच्या मालकीचा असून, तेथे भाडेकरू राहतात. त्याच घरामध्ये मोठी आग लागली. त्या आगीने क्षणात रौद्ररूप धारण केले. ती आग मजल्यावरील लॉबीत पसरल्याने मोठ्या प्रमाणात धूर झाला होता. तसेच या धुराचा त्रास दोघांना झाल्याने त्यांना खासगी रुग्णालयात उपचारार्थ दाखल करण्यात आले. त्या वेळी तेथील डॉक्टरांनी जयश्री ठाकरे यांना मृत घोषित केले. तसेच आगीने मोठ्या प्रमाणात नुकसान झाले आहे. तसेच त्या आगीवर जवळपास सव्वा तासांनी पूर्णपणे नियंत्रण मिळविण्यात अग्निशमन दलाच्या जवानांना यश आले. या वेळी ३ फायर वाहनासह, १ ब्रँटो वाहन, १ बस, २- पीकअप वाहन आणि ५ रुग्णवाहिकांना पाचारण केले होते. तसेच घटनेची माहिती मिळताच घटनास्थळी ठाणे पालिकेचे मुख्य अग्निशमन अधिकारी गिरीश झळके, कापूरबावडीचे पोलिस अधिकारी व कर्मचारी, महानगर गॅस, महावितरण, अग्निशमन दलाचे जवान, आपत्ती व्यवस्थापन कक्षेचे अधिकारी-कर्मचाऱ्यांनी धाव घेतली, अशी माहिती आपत्ती व्यवस्थापन अधिकारी यासिन तडवी यांनी दिली.