शिळफाटा मतदारयादीत १४० मतदारांची दुबार नावे

खोपोली, ता. १५ (बातमीदार) ः देशात विरोधी पक्षनेते राहुल गांधी व इंडिया आघाडीमार्फत निवडणूक आयोगावर वोटचोरीचे आरोप लावण्यात आलेले असताना आम आदमी पक्ष खोपोलीतर्फे कर्जत खालापूर १८९ विधानसभेतील खोपोली शहरातील शिळफाटा येथील प्रभाग क्रमांक १० येथील मतदारयाद्या तपासल्या असता साडेचार ते पाच हजार मतदारांपैकी १४० मतदारांचे नाव यादीमध्ये दोन वेळा आलेले आढळले आहे.
अनेक असे मतदार स्थलांतरित झालेले असताना त्यांचे नाव अद्यापही यादीमध्ये कायम आहे. काही मतदार असे आहेत जे मयत झालेले आहेत; परंतु अजूनही त्यांचे नाव यादीमधून वगळण्यात आलेले नाही. फक्त खोपोली शिळफाटा येथील यादीमध्ये जर इतक्या प्रमाणात घोळ असेल, तर पूर्ण विधानसभेमध्ये किती मोठ्या प्रमाणावर मतदार घोळ असेल, असा सवाल आम आदमी पार्टी प्रदेश संघटन सचिव डॉ. रियाजखान पठाण त्यांनी उपस्थित केला आहे. मागील निवडणुकीत कर्जत खालापूरमधील दोन नंबरवर असलेले विधानसभा उमेदवार सुधाकर घारे फक्त ५,००० मतांनी पराभूत झाले होते, हे विशेष आहे. आम आदमीतर्फे खालापूर तहसीलदार व निवडणूक आयोगाला याद्यांमध्ये दुरुस्ती करण्याबाबत पत्र देण्यात आलेले असून, पुढील निवडणुकीकरिता दुरुस्ती केलेल्या याद्याच वापरण्यात याव्यात, अशी मागणी पक्षाचे खोपोली शहर अध्यक्ष ग्यासुद्दीन खान यांनी केली आहे.