पवईत घराची भिंत कोसळली
घाटकोपर, ता. १५ (बातमीदार) : मुंबईत शुक्रवारी (ता. १५) सकाळपासून पावसाने जोर धरलेला असताना पवईतील आयआयटी परिसरातील फुलेनगर भागात एका घराची भिंत कोसळल्याची दुर्घटना घडली आहे. या दुर्घटनेत दिनेश विश्वकर्मा (वय ५०) हे गंभीर जखमी झाले आहेत. ते त्या घराजवळून जात असताना अचानक भिंत कोसळल्याने त्यांच्या डोक्याला गंभीर दुखापत झाली. त्यांना तत्काळ खासगी रुग्णालयात दाखल करण्यात आले असून, सध्या त्यांच्यावर उपचार सुरू आहेत. घटनेची माहिती मिळताच अग्निशमन दल आणि पोलिस घटनास्थळी दाखल झाले असून, पुढील तपास सुरू आहे.